BAUCAU, 01 outubru 2021 (TATOLI)–Komandante Eskuadra Polísia Nasionál Timor-Leste (PNTL) postu Venilale, munisípiu Baucau, Sarjentu Xefe Marcos da Silva Soares, hateten, rejista kazu hamutuk 13 iha fulan-ida nia laran.
“Durante fulan-agostu to’o setembru nia rohan, ami rejista kazu hamutuk 13, ne’ebé maioria kazu disputa rai hamutuk 12 no kazu violasaun seksuál ida,” komandante Eskuadra informa iha ninia knaar fatin, sesta ne’e.
Kazu disputa akontese iha fulan-agostu, ne’ebé kazu hirak ne’e la kontinua ba oin tanba suspeitu no vítima konkorda malu hakarak rezolve tuir dalan kultura.
Hafoin vítima ho suspeitu dada hikas kazu hirak ne’e, durante fulan-setembru kazu disputa rai hahú redúz no mosu fali kazu violasaun seksuál ba família ida iha suku Uato-haco, ne’ebé daudaun ne’e iha hela prosesu investigasaun nia-laran.
“Kazu ne’e akontese tanba suspeitu ne’ebe halo violasaun seksuál, hetan ta’a hosi vítima nia laen kaben, enkuantu parte Polísia seidauk bele fó sai identidade suspeitu no vítima tanba sei iha prosesu investigasaun nia-laran,” nia akresenta.
Jornalista : Natalino Belo
Editora : Julia Chatarina
