DILI, 02 outubru 2021 (TATOLI) – Pra Liga Futsal Timor – Leste jornada 12, iha tinan ne’e, partisipa husi ekipa oioin, ho treinadór no jogadór ho nia abilidade no tékniku rasik, hodi buka konkista vitória.
Entre ekipa sira ne’e inklui mós ekipa Mauputar FC no M-VDL. Hanesan mós ekipa seluk ne’ebé kompete iha Pra Liga Futsal ne’e, ekipa rua mós iha ambisaun atu sai vensedór. Tanba ne’e, iha sábadu kalan ne’e, akontese jogu ida, tuir oráriu, entre ekipa Mauputar FC ho M-VDL.
Iha jogu ne’e, Mauputar FC susesu “putar” ka susesu fó golu haat ba nia adversáriu M-VDL Lahane; eskoru 4-0 durante jogu. Maputar FC festa golu hasoru M-VDL Lahane.
Hanesan baibain, ekipa rua hasoru-malu sempre lansa kontra ho atake ba malu tuir tékniku no abilidade ida-idak nian hodi buka rezultadu ne’ebé di’ak ba ekipa.
Ekipa VDL halo kontra atake ho bola long ka jogu ofensivu maibé tékniku hotu nia halo hela la rezulta golu ruma ba ekipa.
Mauputar iha minute primeiru halo jogu ne’ebé ho ofensivu maibé lais hodi buka atu prodús lalais golu, nune’e iha duni rezultadu “brillante” tanba iha de’it minutu, jogadór Jenilton Pinto konsege fura rede M-VDL no lori rezultadu ba tuur iha 1-0.
Jogu komesa manas liután. VDL iha emosaun ne’ebé maka’as atu halo golu kontra Mauputar maibé barak ne’ebé M-VDL halo hela de’it nu’udar sutu “mamuk” tanba la kona iha alvu guarda-rede Mauputar ho abilidade personál ne’ebé iha konsege salva bola hotu husi jogadór M-VDL nia ain.
Jogu ne’e “fairplay” maibé tanba kompetisaun, ekipa rua halo esforsu, implementa tékniku no hamosu oioin atu manan jogu. Nune’e, iha iha minutu 24, Davidson Lopes halo tan golu ida hodi muda rezultadu ba 2-0.
Hosi golu ne’e, halo M-VDL tenke serbisu maka’as no “liki kosar” liután iha iha kampu laran. Maske nune’e, VDL la konsege hetan nafatin rezultadu tanba jogadór Mauputar tenta hamate tutuir M-VDL nia jogu. Tantu pasa husi ain ba ain, nune’e mós “cabeça” no seluktan.
Tuirmai, iha minutu 37 ka liu de’it minutu 13, ekipa Mauputar prodús tan golu ida nu’udar terseiru golu husi jogadór Mario Moniz. Komparasaun rezultadu, entre Mauputar FC ho M-VDL, dook tebes ona enkuantu tempu besik hotu daudaun.
Ekipa Mauputar enerjétiku liután. Liu de’it minutu ida ka minutu 38 iha jogu, Ruben Faria finaliza tan golu ba guarda-rede M-VDL nian, nune’e hatuur eskoru Mauputar nian ba 4-0, to’o minutu termina. Vitória hela ba Mauputar FC.
Jornalista: Hortêncio Sanchez
Editór: Rafy Belo
