DILI, 04 outubru 2021 (TATOLI)—Reponsável másimu Fitun Matebian, Justinho Barboja Pereira, hateten, daudaun grupu produsaun ne’e konsege transforma mina-nuu ba mina-virjin hodi fa’an iha merkadu.
“Produsaun ne’e hahú iha tinan 2018, durante ami halo produsaun, hola nuu hosi komunidade Lautém no Baucau. Nuu sira ami transporta mai ami-nian fatin prosesamentu produsaun mina no ami halo produsaun iha ne’ebá, ne’ebé kada loron ami bele prodús litru 100, dala ruma liu, no ami fa’an filafali iha merkadu lokál ho nasionál,” Justinho Barboja Perreira Pereira, haktuir ba Agência TATOLI, iha Lecidere, segunda ne’e.
Maski nune’e, iha situasaun COVID-19, halo produsaun mina-virjin menus tanba demanda merkadu lokál no nasionál tun.
“Uluk seidauk COVID-19, ami loron ida litru 50 to’o 80, maibé agora tanba COVID-19ema ladun halo movimentu, tanba ne’e loron ida ami bele prodús 20 litru to’o litru 30 de’it,” nia akresenta.
Produsaun mina-virjin ho manuál, ne’ebé prosesu la hamanas maibé hatuur de’it, to’o nia nuu-ben rasik mak haketak-an.
“Ne’e liu ona filtrasaun, ami filtra tiha hodi haketak been no nuu-ten, hafoi hatama ba embalajen hodi sai mina-virjin. Embalajen sira rasik importa, enkuantu stiker sira ami maka dezeña,” nia akresenta.
Ba produsaun ne’e, kada loron grupu ne’e sosa nuu tonelada lima hosi komunidade.
Nune’e mós, Fitun Matebian partisipa iha programa Cesta Bázika ho produtu mina-virjen ho kuantidade boot.
“Mina virjin sai item ida iha Cesta Bázika, entaun iha momenu ne’e ami halo produsaun maka’as liu tan, hosi litru 102 to’o 125 kada loron,” Reponsável másimu grupu hatutan.
Jornalista : Natalino Costa
Editora : Julia Chatarina
