DILI, 04 outubru 2021 (TATOLI)—Governu liuhosi Ministériu Administrasaun Estatál (MAE) no Sekretaria Estadu Protesaun Sivil (SEPS) iha ona solusaun hodi muda vítima inundasaun sira ne’ebé daudaun iha sentru akollimentu ba fatin tomporáriu.
“Ba sira-ne’ebé konkorda hela ho família no deside ba munisípiu, Governu apoiu materiál konstrusaun no transporte hodi lori sira, maibé sira ne’ebé seidauk fila Governu sei haree meiu saida mak bele halo, lei fó dalan halo alojamentu no Governu kontinua halo mediasaun no identifika sira atubele muda ba fatin seluk. Ba sira ne’ebé seidauk bele ba tanba laiha fatin, solusaun ida maka tau iha alojamentu temporáriu hanesan kost, maibé sei identifika uluk molok implementa,” Sekretáriu Estadu Protesaun Sivil, Joaquim José Gusmão dos Reis Martins, relata hafoin reuniaun semanál ho Primeiru-Ministru, Taur Matan Ruak, iha Rezidénsia Ofisiál, Farol, segunda ne’e.
Notísia relevante: KM analiza opsaun realojamentu ba vítima inundasaun
Maski nune’e, meiu di’ak liu ne’ebé SEPS opta, mak halo mediasaun ho vítima inundasaun sira atubele hela iha fatin ne’ebé apropriadu no dook hosi risku dezastre.
Daudaun ne’e, família hamutuk 135 mak sei iha sentru akollimentu, ne’ebé hosi totál ne’e, na’in-69 mak konkorda fila ba sira-nia fatin iha munisípiu no restu koordena ho Governu hodi muda ba fatin provizóriu.
Jornalista : Antónia Gusmão
Editora : Julia Chatarina
