Aileu, 02 outubru 2021 (TATOLI) – Governu nia prioridade ida iha situasaun pandemia Covid-19 mak mitigasaun no eliminasaun surtu Covid-19 ne’e ho vasina. Tanba ne’e, Governu Timor-Leste liuhusi desizaun Konsellu-ministru deside hola ai-moruk vasina nian hanesan AstraZeneca inklui mós Sinovac ho apoiu husi parseiru sira hodi vasina sidadaun sira atu komate vírus ne’e. Hanesan kompromisu ida husi Governu nian, nune’e Governu ministériu sira inklui Ministériu Asuntu Parlamentár no Komunikasaun Sosiál (MAPKOMS) dezempeñadu inklui halo esforsu hodi kontinua halo konsensializasaun no sensiblizasaun nasionál atu sidadaun sira bele simu vasina. Iha sábadu ne’e, Ministériu Asuntu Parlamentár no Komunikasaun Sosiál (MAPKOMS) kontinua sosializa no enkoraja komunidade ne’ebé hala’o atividade iha merkadu munisípiu Aileu kona-ba vasina no konvida komunidade atu simu vasina ne’e.
Produsaun Tatoli I.P @2021
