DILI, 04 outubru 2021 (TATOLI)—To’o oras ne’e stoke vasina Astrazeneca ne’ebé mak iha armazen Servisu Autonómu Medikamentu no Ekipamentu Saúde (SAMES) hamutuk vial 26.130 no doze rihun 270 resin, Diretór SAMES, Santana Martins informa.
“Hanesan ita hatene katak vasina Astrazeneca ne’ebé mak ita simu agora daudaun ita halo armazenamentu iha sentrál ho totál balansu hamutuk vial 26.130. Hatudu katak iha doze rihun 270 resin mak ita sei rai iha armazen SAMES,” Diretór SAMES, Santana Martins dehan ba jornalista sira iha nia kna’ar fatin, ohin
“Dadus ne’ebé mak ita iha item balun mak sei espiradu iha loron 9 fulan novembru no 30 novembru 2021. Durante ne’e, ita esforsu oinsá para estoke vasina ne’e bele sai ba munisípiu liuliu ida atu espira daudauk iha 31 outubru ne’e, ita halo jestaun ida katak ita konsege halo dadus no lori sai hotu ona ba munisípiu. Ita prioritiza ba iha fasilidade saúde sira para vasina karik, uza uluk ida ne’e,’’ Ezekutivu ne’e reforsa.
Nia informa, vasina espira iha loron 09 fulan novembru hamutuk vial 13.130 no tuir loron 30 novembru ninia mak vasina iha hamutuk vial rihun 13 resin ne’ebé mak sei iha. Signifika, kuantidade ida ne’e maka’as hela tuir SAMES nia kalkulu, espera katak esforsu ne’ebé mak Governu halo bele utiliza.
“Apoiu husi Governu Xina mak Sinovac ne’ebé mak ita hotu hatene katak ita simu 100 mil viál. Oras ne’e vasina ne’ebé mak iha armazen hamutuk rihun 7.058 item, ne’ebé mak ita simu husi Governu Xina ninian ida ne’e ita foku liu ba iha munisípiu tolu. Agora ba munisípiu sira seluk ita la iha tanba durante vasina ne’e ita distribui ba Dili, RAEOA, ho Covalima,’’ Nia esplika.
Aleinde ne’e vasina ne’ebé mak atu espire iha fulan outubru, iha aramazen sentrál, SAMES la iha ona tanba distribui hotu ona ba munisípiu. Agora iha SAMES mak vasina Astrazeneca ne’ebé espira iha loron 9 to’o 31 novembru nian. Vasina hirak ne’e husi doadór sira hanesan Governu Austrália, Nova Zelándia, Portugal, Japaun no mós husi Covax Facility.
Notísia relevante:Armazen SAMES importante atu asegura ai-moruk
Jornalista : Felicidade Ximenes
Editór : Rafy Belo
