VIQUEQUE, 05 outubru 2021 (TATOLI)- Ministériu Agrikultura no Peska (MAP) entrega Asosiasaun Alumni Arava International Center For Agriculture Training (AICAT) hamutuk na’in 17 ba autoridade munisípiu Viqueque hodi tau-matan ba Sentru Integradu Agrikultura Raitahu, suku Uma Uain Kraik.
“Alumi sira ne’e mai la’ós hadau ita-nia serbisu. Xefe suku, xefe aldeia sira no komunidade kolabora hamutuk ho sira hodi projetu Sentru Integradu Agrikultór iha área Raitahu bele la’o ba oin,” Administradór munisípiu Viqueque, Januario Soares ‘Boly’ ba jornalista Agência Tatoli, hafoin ramata simu alumni AICAT, iha suku Uma Uain Karik, postu Viqueque Villa, tersa ne’e.
Autoridade munisipál Viqueque hatutan, alumni sira ne’e iha esperiénsia tanba sira aprende ona iha Israel no agora sira mai bele implementa iha eko no agro-turizmu no hamutuk joven na’in 105 maka sei serbisu iha Sentru Integradu Agrikultura Raitahu.
“Ohin, fatin Sentru Integradu Agrikultura ba eko, agro-turizmu sei iha ai-laran, bainhira alumni sira dezenvolve di’ak ema sei mai vizita barak no sei fó-reseita ba komunidade,” nia hato’o.
Nia mós husu komunidade nia apoiu hodi atividade implementasaun Sentru Integradu Agrikultura bele la’o di’ak no lori Viqueque ba oin.
Iha fatin hanesan, Diretór nasionál MAP husi Diresaun Komérsiu Indústria, Fernando Amaral, hateten, serbisu Sentru Integradu Agrikultór ne’e entrega ba AICAT sai nu’udar tékniku hodi serbisu hamutuk ho joven sira.
“Ohin, entrega ona alumni AICAT ba autoridade munisípiu Viqueque ho objetivu atu tau-matan ba atividade sira ne’ebé sei realiza iha Sentru Integradu Agrikultór Raitahu. Ita-nia asset boot maka AICAT tanba sira aprende ona iha Israel fila mai aproveita ho didi’ak,” Nia informa.
Alumni AICAT, tuir ezekutivu ne’e katak sei la permanenti iha Sentru Integradu Agrikultór tanba ne’e joven sira husi suku tenke aproveita aprende ho alumni AICAT.
Alumni hirak ne’e, sei tau-matan ba atividade hanesan, re-florestasaun, indústria ki’ik, pekuária, peska, ortikultura no plantasaun ne’ebé MAP instala iha Raitahu, munisípiu Viqueque; okupa rai ektar 140.
Entretantu serimónia entrega alumi AICAT na’in 17 ba administradór Munisípiu Viqueque Januario Soares ‘Boly’, no entrega ba suku hodi destaka ba sentru Integradu Agrikultór ba eko-turizmu, hetan partisipasaun husi komunidade suku Uma Uain Karik.
Notísia relevante:MAP halo abertura sentru agro-komérsiu iha Viqueque
Jornalista: Vitorino Lopes da Costa
Editór: Rafy Belo
