DILI, 05 outubru 2021 (TATOLI) – Ekipa Maudoko FC “nakdoko” bainhira kontra nia adversáriu Gamer FC iha jogu kontinuasaun Pra Liga Futsal Timor–Leste ne’ebé hala’o, tersa kalan ne’e iha kampu futsal FALINTIL-Forsa Defeza Timor – Leste (F-FDTL) Fatuhada, Dili.
Maudoko obrigadu tenke “nakdoko” tanba laiha kbiit naton hodi luta kontra Gamer FC ne’ebé hamriik metin iha nia pozisaun halo Maudoko nein fó golu ida iha sira-nia jornada.
Forsa Gamer nian hatudu duni prova iha minutu 40 jogu la’o, konsege rezulta golu hitu ba Maudoko halo Maudoko tenke lakon Pontu tolu iha jogu ne’e.
Bainhira oras jogu nian hahú, kontra no atake ba ekipa rua komesa la’o kedan tuir abilidade ekipa ida-idak nian. Hosi jogu ekipa rua ne’e nian akompaña mós apoiu haklalak hosi adeptu ne’ebé hamriik fahe ba parte rua iha rede sorin sorin kampo ninin.
Maudoko…!! Maudoko! Forsa Maudoko, adeptu Maudoko nian hakilar ho lian maka’as sente kampu atu ‘rahun’ tiha de’it. La’ós ne’e de’it hanesan mós ho ekipa Gamer nian ne’ebé la nonok hakilar maibé ho kalma.
Bainhira minutu 2, Jogadór Maudoko Ricky Fernandes halimar bola iha rede oin no jogadór Gamer nian Francisco Pereira uza kedan oportunidade hodi hadau bola hosi ain Ricky nian lansa kedan sutu ida ho velosidade ne’ebé maka’as halo guarda-rede Maudoko Carlito la konsege salva, rezulta duni golu hodi hatuur eskoru ba 1-0.
Hosi golu lais ne’e komesa taka neneik ona adeptu Maudoko nian ibun ne’ebé iha minutu primeiru hakilar loos. Jogu kontinua la’o manas liután ho emosaun maka’as hosi jogadór na’in sanolu ne’e.
Sutu barak mak jogadór Maudoko nian lansa ba guarda-rede Gamer maibé sutu hirak ne’e hela de’it hanesan sutu tanba barak la kona iha alvu no balun salva guarda hosi Reinaldo Freitas.
Reinaldo mantein iha nia pozisaun hodi salva tutuir bola ne’ebé mak jogadór Maudoko sira lansa.
Haree ba forsa hosi ekipa ne’ebé lidera hosi treinadór Elizeu Isaac komesa tuun ba bebeik. Treinadór Gamer Aquelino da Costa uza kedan oportunidade hodi halo mudansa ba jogu atu bele halo lalais golu hodi hetan pontu tolu iha jogu jornada 13 ne’e.
Mudansa ne’ebé hala’o la hela de’it hanesan mudansa tanba iha minutu 17 Francisco lansa tan golu ida ba rede Maudoko lori kedan eskoru sa’e ba 2-0.
Golu ne’e halo adeptu hosi Gamer nian hakilar ho esperansa no mosu ona iha sira-nia hanoin sei manan. Manan duni.
Foin golu rua de’it halo adeptu Maudoko komesa lian-laek ba dadauk, kampu komesa atu mamuk de’it ona no la hanesan minutu primeiru hahú.
Jogu sai manas liután, Gamer halo kontra atake ho velosidade ne’ebé maka’as tanba deskobre ona pontu fraku hosi jogadór Maudoko nian.
Nune’e iha minute 18 Lesy Atok prodús tan golu ida lori rezultadu sa’e ba 3-0. Golu ne’e mak hanesan golu ikus iha minutu primeira parte nian.
Hakuur ba segunda parte iha minute 20 ikus, jogu la’o manas liután tanba Gamer hakarak prodús golu ne’ebé barak. Ambisaun ne’ebé Gamer iha iha duni faktu tanba minutu 27 Francisco fura tan rede ne’ebé guarda hosi Carlito hatuur kedan rezultadu ba 4-0.
Adeptu Maudoko nian namkarik fahe malu to’o laiha tiha lian tanba haree ba rezultadu ne’ebé namlele dook los ona halo sira-nia vontade lakon atu fó apoiu.
Jogadór Maudoko nunka lakon esperansa nafatin halo servisu maka’as iha kampu laran maski la hatudu rezultadu.
Haree ba frakeza Maudoko nian iha kampo laran laiha mudansa, jogadór Gamer Lesy Atok utiliza kedas oportunidade hodi lansa golu rua tutuir malu iha minutu ’31, ’32, lori kedan eskore ba 6-0.
Jogu atu termina ona bola barullu maka’as iha rede Maudoko nia oin jogadór Gamer David Pereira iha minutu 39 marka tan golu ikus hodi hametin eskore ba 7-0 to’o minutu termina Gamer mak iha direitu absoluta ba hetan pontu tolu no Maudoko fila ho zero hodi hein jogu tuir mai.
Eskuad Maudoko
Carlito (1), George Afonso (10), Ricky Fernandes (14), Mario Freitas (30) no Mateus Barreto (3).
Eskuad Gamer
Reinaldo Freitas (95), Lesy Atok (8), Francisco Pereira (26), Elvis Silva (9) no David Pereira (28).
Jornalista: Hortencio Sanchez
Editór: Rafy Belo
