DILI,05 outubru 2021 (TATOLI)-Diretora Saúde Munisípiu Dili Agostinha Seguradu hateten ba sidadaun Timoroan no estranjeiru ne’ebé maka daudaun ne’e seidauk hetan vasina COVID-19, presiza atu simu vasina tanba kriteria ida atu hala’o viajén ba rai-liur persiza sertifikadu vasina.
“Joven sira ne’ebé presiza ba rai-liur, ami sei fasilita ho sertifikadu vasina nian ne’ebé lalika tauk atu simu vasina AstraZeneca no Sinovac,” Agostinha Seguradu hateten bainhira partisipa programa kampaña nasionál kona-ba vasinasaun COVID-19 iha aldeia Rosário no aldeia 07 de Dezembru, suku Madohi, Postu Administrativu Don Aleixo munisípiu Dili.
Notísia Relevante :Vasina sei salva ema nia vida husi COVID-19
Kona-ba vasina AstraZeneca no Sinovac, nia dehan bazeia ba rekomendasaun husi Organizasaun Mundiál Saúde (OMS) katak vasina rua ne’e seguru no la perigu ba ema-nia vida, tanba ne’e, ema hotu-hotu tenki kontribui hodi simu vasina.
Iha fatin hanesan Vise Primeiru Ministru no mós Ministru Planu no Ordernamentu, José Maria dos Reis, hateten kampaña vasina COVID-19 ne’e ho objetivu hodi enkoraja komunidade sira atu simu vasina nune’e bele halo prevensaun no propagasaun ba moras corona virus.
“Dalan ne’ebé atu prevene ne’e mak liuhosi vasina tanba ne’e husu ba komunidade hotu iha Aldeia rua ne’e hotu-hotu sira ne’ebé seidauk simu vasina bele simu vasina nune’e ita isin bele forsa no iha imunidade hodi kontra COVID-19,”Governante ne’e hateten.
Hatan ba pedidu husi Governu no Saúde Munisípiu Dili nian ne’e, komunidade Maria de Lima informa sente konvensidu ona hodi simu vasina tanba liuhosi vasina maka bele hasa’e imunidade ema-nian kontra COVID-19.
“Maibé ohin ha’u rona informasaun direitamente hosi ita-nia membru Governu ha’u sente katak ita presiza fiar Governu tanba lia falsu ne’e mai atu estraga ita iha tempu COVID-19 ne’e,” nia hateten.
Aleinde ne’e, Xefe Suku Madohi Bernardino de Cristo Ferreira relata tuir dadus populasaun hamutuk 23.400 maka prienxe ona kriteria hodi simu vasina. No husi dadus ne’e kuaze ema rihun 10-resin maka oras ne’e simu ona vasina.
“Liuhosi sosializasaun mobile klínika ne’e dalan di’ak ida oinsá ita konsolida ita-nia komunidade hotu partisipa vasina,” nia hateten.
Notísia Relevante :PM orienta membru Governu hala’o kampaña vasinasaun iha territóriu nasionál
Jornalista : Arminda Fonseca
Editór: Agapito dos Santos
