DILI, 06 outubru 2021 (TATOLI)-Ministériu Edukasaun Juventude no Desportu (MEJD) tuir alvu katak to’o fulan-abríl 2022, sei konklui ona projetu kontrusaun ba sala eskola hamutuk 657 iha territóriu Timor-Leste.
Ministru Edukasaun Juventude no Desportu, Armindo Maia hato’o asuntu ne’e, bainhira akompaña serimonia asina nota kooperasaun ho Banku Nasionál Komérsiu Timor-Leste (BNCTL-sigla portugés), hodi ezekuta osan hamutuk millaun $20-resin ba implementasaun projetu konstrusaun sala de aula hamutuk 657.
Notísia Relevante :MEJD no BNCTL sei ezekuta osan millaun $20-resin
“Ita hakarak aselera prosesu konstrusaun ne’e, tanba ita-nia kondisaun eskola barak ladiak ona, ita reforsa prosesu ne’e hahú agora atu bele finaliza iha marsu ka abríl 2022,”Armindo Maia hateten iha salaun enkontru MEJD Villa-Verde, segunda ne’e.
Nia dehan, prosesu ezekusaun projetu ne’e tenke aselera tanba daudaun ne’e eskola barak hetan estragus husi dezastre naturál hanesan anin sobu no inundasaun ne’ebé akontese iha tinan 2021.
“Eskola ida iha Lolotoe Munisípiu Bobonaro ne’ebá anin sobu kalen sira naksobu hotu. Ita presiza apoiu emerjénsia atu labarik sira bele eskola filafali, ne’e duni ho projetu komunitária ne’e ita tau mós prioridade atu hadi’a eskola refere,” tenik tan.
Projetu ne’e gasta orsamentu jerál Estadu (OJE), ihosi fundu transferénsia públika ne’ebé aloka ba Ministériu Edukasaun Juventude no Desportu iha 2021.
Jornalista : Tomé Amado
Editór : Agapito dos Santos
