VIQUEQUE, 05 outubru 2021 (TATOLI)- Gabinete Primeiru-Ministru (GPM), tersa ne’e, distribui formuláriu prémiu nutrisaun Primeiru-ministru ba grupu kompetitór-sira iha munisípiu Viqueque.
“Ohin ita distribui formuláriu prémiu nutrisaun Primeiru-Ministru nian ba ita-nia Grupu Suporta Inan, saúde, agrikultór iha munisípiu Viqueque hodi kompete ba prému sira ne’e,” Reprezentante GPM, Jaimé dos Reis, hateten ba jornalista Agência Tatoli, iha salaun adiministrasaun Viqueque, tersa ne’e.
Jaimé hatutan, grupu suku, grupu to’os-na’in, grupu feto, grupu juventude no Grupu Suporta Inan ne’ebé kontribui no hadi’a má nutrisaun no in-seguransa ai-han iha Timor-Leste.
“Tanba ne’e, ami konvida hotu administradór lima no xefe suku sira, grupu-sira no liña ministeriál sira iha Viqueque, atu ami aprezenta kona-ba lala’ok atribuisaun prémiu nian no ami hato’o formuláriu ba kategória sira hodi konkorre ba prémiu,” Jaimé haktuir.
Nia dehan, grupu sira entuziasmu hakarak konkorre ba prémiu nutrisaun nian ba tinan ida ne’e, hodi bele aplika ba prémiu sira ne’e.
“Dadus kona-ba nutrisaun no in-segurasa ai-han nian, ita-nia dadus husi Ministériu Saúde hatudu katak ema rais badak ne’e to’o 47.1 %, isin krekas rejista 8.6%. Ami hato’o ba grupu sira no autoridade lokál oinsá kontribui atu to’o tinan 2020, 2025 to’o 2030 sira nian kontribuisaun bele redus in-seguransa ai-han 36% hatun ba zero, rais badak 47.1% menus ba 25% no isin krekas 8.6% menus 3%,” Nia relata.
Husi indikadór sira ne’e, parte autoridade lokál sira tenke partisipa másimu hodi atinji meta ne’ebé deside hamutuk hamenus má no in-seguransa ai-han iha TL.
Prémiu ba manan-na’in sira apoiu Gabinete PM Prémiu, primeiru lugar kada kategoria, dahuluk $5.000, daruak $3.000, no datoluk hetan $ 2.000
Nia informa, realiza tanba hetan apoiu finanseiru husi Program Ai-han Mundiál, no hetan asisténsia téknika husi OMS, UNICEF, UNDP, no Governu Austrália.
Entretantu, distribuisaun formuláriu prémiu nutrisaun ai-han ne’e hetan partisipasaun husi autoridade lokál, grupu no liña ministeriál sira iha munisípiu Viqueque.
Jornalista :Vitorino Lopes da Costa
Editór: Rafy Belo
