DILI, 06 outubru 2021 (TATOLI)—Governu liuhosi reuniaun Konsellu Ministru (KM), iha kuarta ne’e, delibera atu autoriza loke prosedimentu aprovizionamentu sira ba adjudikasaun kontratu públiku rua.
“Deliberasaun ne’e atu autoriza loke prosedimentu aprovizionamentu ba adjudikasaun kontratu públiku rua ba projetu konstrusaun ba irrigasaun Laivai, iha munisípiu Lautém no Galata iha munisípiu Baucau,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu, iha Palásiu Governu.
Desizaun ne’e ezekutivu sira foti hafoin akompañ no analiza aprezentasaun hosi Ministru Agrikultura no Peska, Pedro dos Reis.
Projetu irrigasaun Galata sei kobre área ektare 600 no sei benefisia uma-kain 750, enkuantu projetu irrigasaun Laivai sei kobre área ektare 300, inklui natar ektare 176 no sei benefisia uma-kain 435.
Jornalista : Antónia Gusmão
Editora : Julia Chatarina
