BOBONARO, 06 outubru 2021 (TATOLI)- Konstrusaun Uma Kbiit Laek (UKL), iha suku Purugua, postu administrativu Cailaco, munisípiu Bobonaro ninia progresu atividade fízika atinje ona 50%.
“Fazeadamente uma tolu ne’e hada ona batako to’o ona leten. Ninia varanda oin mos Cor ona. Konforme rezultadu hosi ekipa PNDS relata mai ami katak kontrusaun ba uma tolu ne’e ninia atinjimentu to’o 50% “Xefe Suku Purugua,Claudino Bere Pelu, informa ba Jornalista Tatoli, iha merkadu Maliana, kuarta ne’e.
Autoridade lokál ne’e haktuir, dezde inísiu hahú konstrusaun atividade fízika hotu la’o ho di’ak, tanba tékniku sira sempre mai halo kontrolu no empreza fornesedór mós fornese materiál fabrikadu sira la atrazu.
Tan ne’e nia louva inisiativa governu liu hosi Programa Nasionál Dezenvolvimentu Suku (PNDS) ajuda ona ninia komunidade harii ona uma dignu ba sira.
“Governu nia programa ida ne’e benífisia direita ba komunidade tanba uluk sira hela iha uma piku no balun didin de’it ho kalen aat. Dalaruma udan monu rai bee tama hotu ba uma-laran mas agora sira-nia sofrementu durante ne’e bele kura ona ho uma dignu ida ne’e,” Nia dehan.
Alende benefísia ba ema kbiit-laek, programa ne’e kontribui mós ba rekuperasaun ekonomia sira nian tanba durante sitausaun pandemia Covid-19 komunidade barak mak la hetan rendimentu hodi sustenta ba nesesidade uma-laran.
“Programa ninia vantazen di’ak ida mak komunidade iha suku laran mak sai badaen rasik. Entaun iha tempu Covid-19, ema barak susar, liuhosi projetu ne’e sira bele hetan netik osan ruma ba hola ai-han,” Nia dehan.
Nia hateten, ba oin sei halo supervizaun ba konstrusaun ne’e,hodi motiva badaen sira atu aselera prosesu,antes udan monu rai obra ne’e bele finaliza ona tuir kontratu servisu durasaun fulan tolu.
Totál orsamentu ne’ebe PNDS aloka mai konstrui uma tolu iha Aldeia Suku Purugua, uma rua ho nia medida 48 m2 hetan $16,627,55 no ida fali medida 37 m2 hetan $14,638,62.
Entertantu, iha tinan fiskál 2021 Governu liuhosi Orsamentu Jerál Estadu (OJE) aloka milliaun $25 hodi konstrui Uma ba kbiit laek (UKL) hamutuk 1.254 unidade iha munisípiu 12 no Rejiaun Administrativu Espesiál Oe-Cuse Ambeno (RAEOA). Uma ne’e konstrui ho tipu ka modelu rua; tipu 48 m2 ne’ebe sei iha kuartu tolu, sala vizita ida no dapur ida no tipu 37 m2 totál kuartu rua, sala vizita ida no dapur. Uma ne’e dezeña mós iha espasu asesiblidade ba ema ho defisiénsia.
Uma kb’it laek hanesan programa Governu konstituisional da VIII liu osi programa nasionál dezenzemvolvimentu suku hodi koresponde ho Planu Estratéjiku Dezenvolvimentu Nasionál (PEDN 2011-2030), ne’ebé rekoñese povu Timor-Leste nia aspirasaun atu harii nasaun ne’ebé forte, prosperu no fó-moris diak, hodi redús pobreza no garante ema hotu hetan oportunidade hetan rai no uma hodi bele tulun nia hala’o moris ho dignu no seguru.
Jornalista: Sérgio da Cruz
Editór: Rafy Belo
