DILI,06 setembru 2021 (TATOLI)-Polísia Nasionál Timor-Leste (PNTL), liuhosi Departamentu Polisiamentu Komunitáriu Nasionál (DPKN), kontinua hala’o programa ‘Kultura Hadomi Vida’, hodi fó formasaun ba estudante no funsionáriu hosi Universidade Dili (UNDIL), hamutuk na’in 30, ne’ebé seida’uk iha karta kondusaun.
Hosi númeru ne’e iha estudante 24 no funsionáriu haat (4), ne’ebé kompostu feto tolu, restu mane.
Formasaun ne’e hala’o iha UNDIL hahú iha loron 04-05 outubru ho teória mak matéria ba kondúz motor no karreta hanesan kódigu estrada, sinál tránzitu, prevensaun krime no seluk tan, hodi bele aumenta kuñesimentu estudante sira nian.
“Ohin sira kontinua prátika ba faze teste karta kondusaun motor no karreta iha Diresaun Nasionál Transporte Terreste (DNTT)”’, Xefe Deparamentu DPKN, Superintendente António da Luz, hateten ba jornalista sira iha edfísíu DNTT, Akanuno-Hera, kuarta ne’e.
Prosesu atu tuir teste karta kondusaun iha faze primeiru, verifika dokumentu maka hodi tuir teste eskrita, orál no tama roda.
Antes ne’e, iha loron 27 setembru tinan ne’e, komandu Jerál Polísia Nasionál Timor-Leste (PNTL), lansa ona programa edukasaun sívika kona-bá “Kultura Hadomi Vida” ba universidade sira iha Timor-Leste.
Komandu jerál PNTL serbisu hamutuk ho Diresaun Nasionál Transporte (DNTT), Polísia Tránzitu Rodaviáriu, Polisiamentu komunitáriu Nasionál no ba iha universidade sira hotu hodi realiza programa ne’e atu bele fó formasaun ba estudante sira ne’ebé mak hatene ona lori motor no kareta tenke iha karta kondusaun.
Komandu Jerál hala’o hela estudu ida, tanba tuir dadus PNTL kada tinan ema lakon vida hosi asidente tráfiku na’in 70 to’o 90, ho idade tinan 10-30, tanba fatór umanu.
Rejista mós kanek no tohar iha asidente no identifika motorista balun laiha karta kondusaun.
Iha parte seluk mós kona-bá krime nian kada tinan rejista ema oho malu 70-liu.
Nune’e liu hosi estudu ida ne’e PNTL kria programa refere oinsá mak bele halo prevensaun ba asidente vida umana.
Iha lansamentu programa “Kultura Hadomi Vida” dahuluk ba Universidade da Paz (UNPAZ). PNTL fó ona formasaun dahuluk ba estudante UNPAZ na’in 30.
Tuir planu PNTL sei kontinua programa ida ne’e ba tinan oin ba munisípiu sira hotu ba joven no estudante ho komunidade hodi aumenta kuñesimentu.
Jornalista:Nelson de Sousa
Editór: Rafy Belo
