DILI, 07 outubru 2021 (TATOLI)-Comité 12 Novembru hamutuk ho ekipa husi Ministériu Asuntu Kombatente Libertasaun Nasionál (MAKLN), kinta ne’e, hala’o sorumutu ida ho Sentru Nasionál Chega (CNC-sigla portugés) hodi aprenzenta dezeñu kona-ba kontrusaun monumentu memoriál 12 novembru no reabilitasaun moru semitériu Santa-Cruz Dili.
Prezidente Comité 12 novembru, Gregório Saldanha hateten sorumutu ne’e atu hametin liña koordenasaun no kooperasaun servisu entre instuisaun hirak ne’e, nune’e bele akompaña prosesu implementasaun projetu ne’e to’o ramata ho susesu.
Notísia Relevante:Konstrusaun Monumentu 12 Novembru iha faze preparasaun konkursu
“Entaun CNC mós hetan knaar hosi ita-nia Governu atu tau matan ba salva guarda kona-ba sítiu istóriku sira ne’ebé iha orijinalidade, tanba ne’e importánsia hosi enkontru ne’e atu servisu hamutuk fó hanoin ba malu,” Gregório Saldanha, dehan ba jornalista sira iha Balide Dili.
Gregório hateten Comité 12 Novembru propoin ba kompañia atu garante kualidade projetu no asegura orijinalidade nune’e labele lakon ninia valór istóriku ba jerasaun foun sira.
Daudaun ne’e, nia relata kompañia Bobolait Unipesoál Lda, hahú implementa ona projetu ne’e hafoin manán konkursu públiku husi Ministériu Asuntu Kombatentes no Libertasaun Nasionál (MAKLN) nu’udar na’in ba projetu.
Iha biban hanesan Diretór Ezekutivu CNC, Hugo Maria Fernandes, hateten tuir dekretu lei númeru 48 Sentru Nasionál Chega nian fó kompeténsia ba instituisaun ne’e hodi prezerva memória pasadu.
“Bainhihra ita ko’alia memória pasadu ne’e ita ko’alia kona-ba ema nia istoria pasadu, fatin no eventu, entaun Comité 12 novembru tinan ne’e atu halo monumentu memoriál Santa-Cruz nian, entaun ami-nia knaar fó hanoin katak, bainhihra atu halo monumentu ida iha kritéria balun tenke priense mak hanesan harii momumentu ruma labele muda ka halakon nia orijinalidade,” nia hateten.
Notísia Relevante:Konstrusaun Monumentu 12 Novembru iha faze preparasaun konkursu
Jornalista : Arminda Fonseca
Editór : Agapito dos Santos
