VIQUEQUE, 07 outubru 2021 (TATOLI)—Xefe suku Nahareka, postu administrativu Ossu, munisípiu Viqueque, Paulino A. Ximenes, informa, populasaun iha suku ne’e enfrenta problema nesesidade bázika hanesan asesu ba estrada, eletrisidade no laiha bee-moos.
“Ami populasaun iha suku Nahareka husu ba Governu atubele rezolve urjente problema estrada no eletrisidade hodi fasilita komunidade halo movimentu no bele asesu ba merkadoria,” Xefe suku Nahareka, hateten, ba Agência TATOLI iha sede suku Nahareka, kinta ne’e.
Suku Nahareka, kompostu hosi aldeia Macabu’u, Maurate, Darenau, Samarogo, no Raila’a, ho totál populasaun 2.000-resin, hosi uma ka’in 500-resin.
Tuir autoridade lokál, bainhira laiha eletrisidade difikulta komunidade sira atu asesu ba informasaun, halo negósiu kiik, inklui difikulta estudante sira estuda iha tempu kalan.
“Ami-nia área iha potensialidade ba setór agrikultura, hanesan bua no nuu, inklui produsaun sira seluk, maibé kondisaun estrada difikulta tebes atu povu agrikultór bele lori produtu lokál ba merkadoria,” nia akresenta.
Maski Autoridade lokál no populasaun iha inisiativa halo ona proposta ba nível nasionál, maibé to’o agora seidauk iha resposta ba problema rua ne’e.
“Ami agradese ba Governu liuhosi Ministériu Obra Públika, ne’ebé lansa konkursu públiku ba projetu instalasaun eletrisidade no estrada, ne’ebé daudaun mai ona halo estudu, nune’e ami espera katak bele aselera implementasaun atu povu bele asesu,” nia hatutan.
Notísia relevante: Empreza 167 iha interese konkorre projetu instala eletrisidade pakote 30
Nune’e mós, Abitante suku Nahareka, Domingos da Costa Tilman, husu ba Governu hodi konsidera preokupasaun sira kona-ba infraestutura bázika atu fasilita komunidade halo movimentu no atividade.
“Ami hakarak husu ba Governu atu fó atensaun ba preokupasaun populasaun sira hanesan estrada, eletrisidade no bee-moos atubele nesesita ami-nia moris loron-loron,” nia dehan.
Tuir nia, komunidade sira halo produsaun bua, nuu, kamii, inklui produsaun seluk, maibé laiha estrada di’ak hodi bele ba fa’an produtu iha merkadu munisipál no nasionál.
Hatan ba preokupasaun ne’e, Ministru Turizmu Komérsiu no Indústria, José Lucas do Carmo da Silva, rekoñese, atu lori produtu agríkola ba merkadu, presiza infraestrutura bázika hanesan estrada di’ak, tanba ne’e Governu sei esforsu atu buka dalan hodi rezolve.
“Governu iha polítika atu halo dezenvolvimentu integradu, liuliu estrada, eletrisidade, no bee-moos, atu fasilita komunidade sira lori produtu lokál ba merkadu, hodi nesesita moris loron-loron,” Ministru afirma.
Nune’e, governante ne’e husu ba populasaun Nahareka atu kontinua halo produsaun tanba iha ona merkadu hanesan implementasaun programa povu kuda, Governu sosa.
“Ita-bo’ot sira bainhira halo produsaun hanesan nuu, kamii, no bua inklui produtu seluk, bele kontaktu parte ministériu tanba ita iha ona merkadu atubele sosa produtu sira,” Ministru fó hanoin.
Daudaun ne’e, Ministériu Obra Públika (MOP) lansa ona programa estrada rurál ba dezenvolvimentu (R4D) ba suku balun iha territóriu no instalasaun liña eletrisidade foun ho pakote 34 hosi Eletricidade de Timor-Leste, Empreza Públika (EDTL, E.P), ne’ebé suku Nahareka tama hotu lista ba programa rua ne’e.
Notísia relevante: MOP anunsia ona rezultadu konkursu estrada rurál Dili no Viqueque
Nune’e mós, Bee Timor-Leste, Empreza Públika (BTL,E.P) daudaun ne’e halo estudu ba bee-moos iha munisípiu Viqueque atubele garante infraestutura bázika ne’e ba komunidade hotu iha territóriu Timor-Leste.
Jornalista : Florêncio Miranda Ximenes
Editora : Julia Chatarina
