OÉ-CUSSE, 07 outubru 2021 (TATOLI)—Prezidente Autoridade RAEOA, Arsénio Paixão Bano, informa projetu konstrusaun perfurasaun sistema bee-moos iha Sonamnasi, suku Cunha, sub-rejiaun Pante Makasar, nia progresu fíziku atinje ona 100% no tuir planu sei inaugura iha semana oin.
Notísia Relevante: Perfurasaun bee-moos iha Sonamnasi atinje 85%
“Agradese ba empreza tanba konstrui obra perfurasaun ne’e ho kualidade tuir padraun hosi Governu, nune’e bele fó benefisiu direta ba populasaun 850 iha aldeia Sonamnasi. Ha’u kontente tebes tanba kualidade bee ho volume boot no garante sei fornese ba populasaun tomak lori tinan barak. Autoridade deside ona katak iha semana oin sei halo inaugurasaun,” Prezidente Autoridade RAEOA ne’e informa ba Agência Tatoli, via telefónika, kinta ne’e.
Rezultadu perfurasaun sistema bee-moos ne’e hatudu volume bee 100 mil litru ho nia debitu bee-moos litru lima (5) kada segundu, fahe ba torneira unidade 14, ne’ebé benefisia ba komunidade uma kain 198 ho populasaun hamutuk 850.
Tanba ne’e, nia husu ba populasaun sira atu kuidadu obra ne’e no uza ho kuidadu tanba primeira vez autoridade rezolve problema bee-moos ho kualidade iha aldeia ne’e.
“Ha’u fiar autoridade lokál sira hamutuk ho populasaun iha Sonamnasi, utiliza didi’ak obra ne’e tanba autoridade konstrui fasilidade ne’e hodi responde komunidade nia halerik durante tinan barak. Ha’u husu kuidadu didi’ak, tanba obra ne’e patrimóniu aldeia Sonamnasi nian atu fó moris ba ema, animál no uza mós ba kuda modo nian,” nia fó hanoin.
Ih tinan 2021 ne’e, autoridade konsege konstrui perfurasaun sistema bee-moos iha sub-rejiaun Oésilo, Nitibe no Pante Makasar, no daudaun ne’e autoridade planea ona atu konstrui-tán perfurasaun bee-moos iha sub-rejiaun Passabe.
Maibé, nia dehan, autoridade hakarak rezolve uluk mak saúde atu liberta populasuan iha Oé-Cusse tenke livre hosi moras COVID-19, aleinde fó improtansia ba problema bee-moos, edukasaun no infraestrutura bázika.
Xefe suku Cunha, Domingos Seco Caunan, hato’o agradesimentu ba autoridade RAEOA tanba durante tinan barak populasaun sira iha aldeia Sonamnasi konsumu de’it bee-mota no bee-posu, maibé ho perfurasaun ne’e bele tulun ona komunidade atu asesu bee-moos ho fasil.
“Tulun hosi autoridade RAEOA ne’e importante tebes ba komunidade iha aldeia Sonamnasi, tanba antes seidauk konstrui perfurasaun sistema bee-moos ne’e, ha’u-nia populasaun konsumu de’it bee-mota,” nia dehan.
Entretantu obra ne’e konstrui hosi Empreza Nun-Mabun Unipesoal, Lda, ho nia kustu kontratu hamutuk $156,325,73, ho durasaun servisu durante fulan neen.
Notísia Relevante: Arsenio Bano: “Ha’u-nia prioridade hakarak rezolve problema bee-moos iha Oé-Cusse”
Jornalista : Abílio Elo Nini
Editór : Cancio Ximenes
