DILI, 07 outubru 2021 (TATOLI)– Plan International hili Melicia dos Reis, Estudante ho idade 13 iha Eskola Bázika Filiál (EBF) Venancio Fraz Ainaro, hodi asume kargu ne’ebé okupa hosi Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, durante oras ida.
Atividade ne’e Plan International organiza hodi komemora loron mundiál labarik feto, ne’ebé kada tinan sempre selebra iha loron 11 outubru, nune’e bele fó oportunidade ba labarik feto asume kargu ezekutivu hodi hetan esperiénsia.
Iha biban ne’e, Melicia dos Reis, apresia no orgullu tanba organizasaun dezenvolvimentu no umanitária ne’e hili nia bele asume kargu nu’udar membru Governu.
“Obrigada ba Sekretáriu Estadu Komunikasaun Sosiál bele fó ona oportunidade ba ha’u, hodi foti pozisaun asumi kargu ne’e ho oras balun, hodi bele hatene papél SEKOMS,” Melicia dos Reis, hateten ba Agência TATOLI, iha Gabinete SEKOMS, Palásiu Governu, kinta ne’e.
Biban ne’e, nia parte dezafia SEKOMS atu kontinua promove komunikasaun sosiál ho di’ak liu tan, nune’e ema hotu bele kontribui buat ne’ebé di’ak no saudável bainhira halo interasaun ho rede sosiál, liuliu facebook, tanba daudaun ne’e ema uza rede sosiál hanesan fasilidade atu kompleta moris loron-loron.
Iha fatin hanesan, Diretór Nasionál Promosaun Dezenvolvime Mídia Lokál (DNPDM), José da Costa, hateten, atividade ne’ebé Plan International halo la’ós ba dahuluk, maibé dala barak ona, hahú hosi labarik sira asume kargu nu’udar Prezidente Repúblika oras ida no kargu ezekutivu seluk.
“Ida-ne’e fó hanoin ba labarik sira hotu atu oinsá asume posizaun importante ida iha institusaun Estadu, liu-liu ba serbisu saida maka SEKOMS halo durante ne’e. Fó hanoin mai ita katak labarik sira bele asumi kargu sira ne’e, maski ho oras ida de’it,” José da Costa akresenta.
Durante Melicia dos Reis asume kargu nu’udar SEKOMS, nia parte halo enkotru ho Diretór no Asesór sira inklui vizita ba diresaun sira ne’ebé maka tutela ba Sekretaria Estadu ne’e.
Tema ba komemorasaun loron mundiál labarik feto ba tinan ne’e maka ‘Mai ita hapara violénsia hasoru labarik feto no joven feto agora’.
Jornalista : Natalino Costa
Editora : Julia Chatarina
