DILI, 07 outubru 2021 (TATOLI)-Inspetór Polísia Sientífika Investigasaun Kriminál (PCIC, siglá portugés), Octavio da Costa Araújo, hateten kontinua fó asisténsia ba sira-nia membru ida ne’ebé hetan detensaun hosi Polísia Nasionál Timor-Leste (PNTL), Komandu munisípiu Dili, no sei la interven serbisu PNTL nian.
“PCIC la halo intervensaun no respeita prosesu ne’ebé PNTL halo ba ami-nia membru ne’e, maibé ami kontinua fó asisténsia legál liuhosi advogadu,” Octavio da Costa Araújo, hateten ba jornalista sira iha edifísiu PDHJ, Caicoli, kinta ne’e.
Nia dehan, internalmente instituisaun halo prosesu averiguasaun hosi kotuk hodi hatene motivu loloos hosi detensaun. No, akontesimentu ne’e bainhira membru ne’e sala duni internalmente sei foti asaun disiplinár tuir regra ne’ebé iha, hanesan sei haree ba grau bele halo transferénsia, suspensaun no demisaun.
Maibé, nia hateten, bainhira membru ne’e la sala mosu violasaun iha prosesu nu’udar sidadaun bele hatama fila-fali prosesu.
Antes ne’e, iha loron 04/10 kalan, parte investigasaun Komandu PNTL munisípiu Dili halo operasaun identifika grupu ida hala’o hela atividade jogu bola guling iha área Dom Bosco Comoro, nune’e membru PCIC ne’e iha mós fatin tenta impede PNTL nia serbisu iha terrenu.
Hafoin PNTL tenta hakalma situasaun maibé menbru PCIC ne’e la koopera no halo membru PNTL ida ulun kanek, nune’e komandu bolu hodi detein iha sela hodi submete ba prosesu identifikasaun.
Dadaun ne’e, membru PCIC ne’e, kumpre hela iha sela detesaun iha Caicoli kumpre oras 72 sei lori ba primeiru interrogatóriu iha Tribunál.
Jornalista :Nelson de Sousa
Editór : Rafy Belo