Bobonaro, 07 outubru 2021 (TATOLI)-Implementasaun programa mão-de-obra faze dahuluk tinan 2021 iha postu administrativu Cailaco munisípiu Bobonaro besik konklui ona.
“Dezde inísiu ita lansa iha 20 setembru, programa ne’e hatudu progresu di’ak tebes; parese loron ida ka rua bele finaliza ona tanba durante loron 14 ona komunidade badinas tebes,”Administradór postu administrativu Cailaco, Alfredo Meta Dau, informa ba Jornalista Tatoli, iha suku Purugua, kinta ne’e.
Administradór ne’e hateten, daudaun ne’e, ekipa responsável ba programa ne’e hahú rekolla no verifika lista prezensa traballadór sira nian, nune’e iha tempu-badak ekipa sira bele tuun ona ba halo pagamentu iha suku.
“Orsamentu ba faze primeiru ne’e ita sei gasta $25 mil tanba ne’e ohin lista prezensa sira ne’e hotu tenke tama ona iha administrasaun postu para ita submete ba fali iha munisípiu, verifika mak halo transferénsia mai ita-nia konta mak ekipa sira sei ba selu tuir loron ne’ebé sira halo serbisu,” Nia esplika.
Autoridade másimu postu administrativu Cailaco ne’e haktuir, implementasaun programa ne’e la’o dala ida iha suku ualu. Komunidade halo limpeza jerál iha estrada-ninin sira, hamoos valeta, ateru no taka estrada ko’ak sira para bele fasilita movimentu ba mai.
Enkuantu, totál komunidade ne’ebé serbisu iha programa ne’e suku ida sei hetan grupu tolu ho totál ema hamutuk 180.
“Hosi Grupu tolu ne’e, iha grupu ida ema na’in 20 maibé sira serbisu troka malu; loron lima grupu ida avansa, tama to’o sira hetan hotu oportunidade. Mas, suku balun populasaun menus pasiénsia sira mak serbisu to’o hotu,” nia haktuir.
Entertantu, totál orsamentu ne’ebé autoridade munisipál Bobonaro aloka mai postu administrativu Cailaco ho totál $50.000. Hosi númeru ne’e sei gastu dala rua ba faze primeiru no segundu.
Enkuantu polítika Governu ba programa ne’e, atu hakbiit komunidade hodi rekopera sira-nia ekonomia família hodi responde ba nesesidade uma-laran.
Jornalista: Sérgio da Cruz
Editór: Rafy Belo
