BAUCAU, 07 outubru 2021 (TATOLI)–Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, hateten postu administrativu Luro tenki sai ezemplu ba postu seluk, hodi partisipasaun kampaña vasinasaun iha munisípiu Lautém.
“Ita-nia autoridade sira prontu kolabora ho komunidade atu prosesa vasinasaun bele la’o lalais no Luro bele fó exemplu ba postu seluk no reprezenta Governu sentrál fó apresiasaun ba kolaborasaun hirak ne’e,” Sekretáriu Estadu dehan iha suku Cotamutu, postu administrativu Luro, hanesan haktuir nota ne’ebé jornalista TATOLI iha Baucau asesu hosi SEKOMS, kinta ne’e.
Governante ne’e apresia ba pesóal saúde ne’ebé durante ne’e halo serbisu maka’as, maski taxa partisipasaun vasina iha postu Luro foin to’o 61%, ne’ebé hatudu ona maioria partisipasaun, maibé tenki kontinua aselera liután atu tuir alvu hosi nasionál.
Tuir SEKOMS, prezensa iha suku ne’e atu fó apoia polítika komunikasaun ba Ministériu Saúde (MS) atu aselera prosesu vasinasaun.
Antes ne’e, Primeiru-Ministru, Taur Matan Ruak, orienta membru Governu hotu tun baze, fó konfiansa ba komunidade atu partisipa vasina, nune’e situasaun ekonomia no dezenvolvimentu bele la’o normál fali.
Notísia relevante: PM orienta membru Governu hala’o kampaña vasinasaun iha territóriu nasionál
“Governu iha responsabilidade atu proteje kada sidadaun, tanba vida karun liu no ekonomia monu maibé bele rekupera fali, maibé ema balun lakon vida tanba labele rekupera moras, tanba ne’e ita tenki asegura uluk direitu fundamentál moris,” nia akresenta.
Nune’e, Sekretáriu Estadu husu atu autoridade lokál sira hanesan xefe suku, aldeia, postu no seguransa, tenki akompanã pesóal saúde halo esplika vantajen vasina kombate COVID-19 hosi uma bá uma komunidade atu implementa vasinasaun.
Akara mós husu atu komunidade hotu labele fiar informasaun falsa ne’ebé lansa hosi pesóal balun iha rede sosiál tanba asuntu saúde labele politiza.
Iha tempu hanesan, Xefe suku Cotamutu, Leopoldo da Conceição, hateten komunidade presiza rona informasaun loloos hosi SEKOMS kona-ba vasinasaun.
“Ita hotu tenki kontribui ba programa kampaña nasionál vasinasaun,” nia hatutan.
Nune’e, líder komunitáriu ne’e husu Xefe aldeia hotu iha suku Cotamutu, atu kontinua servisu, liuliu identifika komunidade ne’ebé seidauk marka prezensa atu tuir vasinasaun, bele partisipa hodi proteje-an hosi COVID-19.
Tuir dadus hosi saúde, postu Luro daudaun ne’e atinje ona 61,65% doze dahuluk vasina, hosi totál komunidade elejível (idade 18 ba leten) na’in-2.426 no kompleta doze daruak hamutuk 30,975% hosi nain-1.210, ne’ebé ho totál na’in-3.935.
Komunidade ne’ebé vasina ona doze dahuluk iha munisípiu Lautém atinje ona 53,4% , enkuantu ema ne’ebé kompleta ona doze daruak 27,7%, hosi totál populasaun 500.000-resin.
Jornalista : Natalino Belo
Editora : Julia Chatarina
