OÉ-CUSSE, 08 outubru 2021 (TATOLI)—Sentru Informasaun COVID-19 iha Rejiaun Administrativa Espesiál Oé-Cusse Ambeno (RAEOA), sesta ne’e rejista kazu pozitivu foun rua (2), ativu 14 no rekoperadu 317.
Notísia Relevante: COVID-19 iha RAEOA, kazu ativu 15 no rekoperadu 317
“Sentru Informasaun COVID-19 iha RAEOA, ohin, rejista kazu pozitivu foun na’in-rua, kazu ativu hamutuk 14 ne’ebé oras ne’e baixa hela iha sala izolamentu Kliníka Kurasaun na’in-ida (1), no iha izolamentu Kitahara Mahata hamutuk na’in-13, no rekopera ona hosi izolamentu hamutuk 317,” Sekretáriu Rejionál Asuntu Saúde, Manuel da Costa, informa ba Agência Tatoli iha Sikluli, Oé-Cusse.
Daudaun ne’e, pasajeiru sira-ne’ebé tama iha Oé-Cusse kumpre hela loron 14 iha kuarentena hamutuk 36, iha dra. Catarina Anunu nia rezidénsia na’in-ida (1), kuarentena Eskola ETARO Masin 24, auto-izolamentu Fulolo rua (2), auto-kuarentena uha Mateus Sufa nia rezidénsia na’in-ida (1), auto-kuarentena Veronika Oématan na’in-ida (1), auto-kuarentena Palaban na’in-ida (1) no auto-kuarentena Ótel Lifau neen (6).
Dadus pasajeiru ne’ebé kumpre kuarentena obrigatóriu 1.770, auto-kuarentena 311 ho totál hamutuk 2.081, pasa ona loron-14 hamutuk 2016 no rejista óbitu tolu (3).
Tuir dadus hosi 23 marsu 2020 to’o 08 outubru 2021, totál dadus komulativu kazu konfirmadu hamutuk 335, hasai teste swab 489, númeru RDT swab 232, komulativu teste swab 3.803, komulativu rezultadu negativu 3.545.
“Situsaun iha Oé-Cusse kontroladu no númeru kazu COVID-19 komesa tun ona tana tasa partisipasaun vasinasaun aumenta. Ita espera, bainhira númeru kazu la aumenta mak atividade hotuu-hotu bele hala’o fali hanesan atividade negósiu iha merkadu la’o normál, igreja, eduksaun inklui serimonia kulturál,” nia dehan.
Jornalista : Abílio Elo Nini
Editór : Cancio Ximenes
