VIQUEQUE, 08 outubru 2021 (TATOLI)-Ministériu Edukasaun Juventude no Desportu (MEJD) halo formasaun refreska kona-ba apoiu lideransa eskola no profesór-sira husi munisípiu Viqueque.
“Ohin, ita formasaun refreska apoiu lideransa eskola sira iha eskola ho objetivu atu haree fila implementasaun programa haat durante ne’e ita implementa iha territóriu iha tinan 2015, Viqueque,” Diretór Nasionál Ensinu Báziku husi MEJD, Tomas Fereira ba jornalista Agência Tatoli, iha salaun edukasaun Viqueque, sesta ne’e.
Diretór ne’e hatutan, programa ne’e foku liubá sala-aula, implementasaun kurríkulu foun ba primeiru siklu no siklu neen hodi haree ba programa ne’e iha kompeténsia haat hanesan observa sala, formasaun ba profesór, formasaun ba grupu traballu, formasaun grupu lider eskola sira no utilizasaun informátika hanesan uza tablet.
“Ita haree fali husi kompeténsia haat ne’e la’o di’ak kla’e. Programa sira ne’e motiva ona profesór sira ka lae, atu hadi’a karakter balun, hanorin tuir manuál. Se profesor-sira seidauk atinji ita haree hamutuk iha formasaun profesór hodi hadi’a,” nia hato’o.
Formasaun refreska ne’e husi MEJD hamutuk ho parseiru sira husi Austrália. Programa ne’e, importante ba profesór-sira hodi hanoin fila programa sira ne’ebé implementa ona liliu kurríkulu edukasaun nian.
Nune’e ezekutivu ne’e dehan, programa ne’e implementa ona 50% iha Timor-Leste. Husi kurríkulu 2021 ne’e, profesór-sira tenke hanorin estudante sai krítika, inovativu no kreativu
Iha biban ne’e, Xefe departamentu INFORDEPE husi Formasaun profesór ensinu pré-eskolár no báziku, Ivan Ximenes hateten, formasaun ba profesór-sira importante liu hodi eleva nafatin manorin sira-nia koñesementu.
“Ohin, loron eskola ativa fila fala ona, hafoin mosu Covid-19 ita-nia eskola barak mak sai paradu. Nune’e agora eskola tama fali ona ne’e profesór sira tenke rekupera matéria sira ne’ebé durante ne’e la fó ba estudante sira,” Ivan haktuir.
Iha fatin hanesan, Diretór servisu eduksaun munisípiu Viqueque, Emidio Amaral husu bá profesór-sira tenki partisipa másimu hodi hatutan fila fali ba estudante sira iha eskola idaidak husi munisípiu Viqueque.
Entretantu, formasaun refreska ne’e hala’o durante loron rua; hahú sexta no sei remata aban sábadu. Formasaun ne’e hetan partisipasaun husi diretór eskola no koordenadór-sira husi munisípiu Viqueque.
Notísia relevante:MEJD husu profesór sira kompensa materia ba estudante
Jornalista: Vitorino Lopes da Costa
Editór: Rafy Belo
