BOBONARO, 08 outubru 2021 (TATOLI)-Xefe suku Lour, postu administrativu Bobonaro, munisípiu Bobonaro, Miguel Lopez Gomez, kompromete sei esforsu mobiliza komunidade kontribui programa nasionál vasinasaun, hodi proteje aan hosi pandemia Covid-19.
“Hanesan autoridade lokál ami-nia obrigasaun mak nafatin fó informasaun ba komunidade bazeia ba orientasaun hosi Ministériu saúde, atu nune’e komunidade mai partisipa hotu iha programa ne’e, tanba ami lakoi komunidade sofre moras aat ne’e,” Nia informa ba jornalista Tatoli via telefónika, sesta ne’e.
Tuir nia, dezde implementasaun programa vasina iha loron 28 to’o 31 fulan juñu, nia komunidade hamutuk 103 mak simu vasina doze primeiru maibé programa ne’e konsege suspende provizóriu tanba inan-faluk, Hilaria de Jesus hakotu iis hafoin simu vasina AstraZeneca.
Enkuantu, iha loron 05 to’o 06 fulan agostu, Ministra Saúde (MS), Odete Maria Freitas Belo re-ativa kampaña vasinasaun, komunidade 102 mak simu tan vasina doze primeiru no segundu. Horseik 07/10, Ministru edukasaun juventude no desportu (MEJD), Armindo Maia, lansa tan programa nasionál vasinasaun iha suku ne’e, komunidade hamutuk 174 mak simu doze primeiru no kompleta.
“Ita-nia alvu lolos ba komunidade elijível ne’e hamutuk 418, maibé agora sira na’in 300 liu mak simu ona, falta de’it 100 liu mak seidauk tanba ne’e mak ba oin ami sei serbisu hamutuk ho saúde, veteranu sira, para nafatin fó informasaun hodi nune’e bele atinje alvu ne’e para komunidade protejida hosi moras ne’e,” Nia dehan.
Lider komunitária ne’e afirma, maski iha fulan hirak ba kotuk akontese ninia komunidade ida mate, hafoin simu vasina AstraZeneca maibé hosi rezultadu vasinasaun ne’ebé mensiona hatudu katak komunidade suku Lour iha entuziasmu mai simu vasina hodi proteje aan hosi Covid-19.
Nune’e nia enkoraja komunidade hosi suku seluk ne’ebé pertense iha munisípiu Bobonaro atu labele fiar informasaun hoax ka bosok ne’ebé espalla iha media sosiál tanba Governu oferese vasina atu asegura komunidade nia saúde hosi kontajia Covid-19 maibé la’ós estraga ema nia vida.
“Dalabarak ita-nia komunidade interpreta dehan hetan kartaun kinur para bele movimentu livre maibé lolos ne’e hetan kartaun kinur para haforsa imunidade isin hodi luta kontra Covid-19,” Nia informa.
Jornalista: Sérgio da Cruz
Editór: Rafy Belo
