AILEU, 10 outubru 2021 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco Jerónimo enkoraja komunidade Suku Betulau, postu administrativu Lequidoe, munisípiu Aileu atu partisipa vasina nune’e hasa’e imunidade hodi bele proteje aan no família hosi moras COVID-19.
Notísia Relevante: MAPKOMS enkoraja populasaun Aileu partisipa vasina
Governante ne’e hatutan, komunidade hotu-hotu presiza partisipa vasina tanba moras COVID-19 iha ona Timor-Leste no hamate ona ema lubuk ida, tanba ne’e antes moras ne’e alastra to’o ba territóriu Timor laran tomak, dalan úniku atu prevene mak liuhosi vasina de’it.
“Tanba ne’e, ha’u enkoraja ba komunidade Betulau tomak hodi partisipa vasina tanba Vasina maka númeru dahuluk ba ita Timor-Leste hosi fó protesaun ba ita-nia saúde no halo prevensaun ba moras COVID-19, atu nune’e ita bele halo atividade ekonómika ho avontade no importante maka uza máskara,” Ministru Asuntu Parlamentár no Komunikasaun Sosiál, Francisco Jerónimo enkoraja komunidade, bainhira hala’o abertura ba kampaña nasionál vasina COVID-19 iha Suku Betulau, sábadu ne’e.
Estadu esforsu buka vasina tanba hakarak nia povu moris saudavel, tanba inan-aman sira tinan 60 ba leten hosi loron ba loron sira-nia imunidade menus ba beibeik. Tanba ne’e, presiza simu vasina nune’e bele moris ho saúde ne’ebé di’ak no moris hakmatek atu bele hala’o atividade ekonomia ho avontade.
Tanba COVID-19 sai problema bo’ot ba Timor-Leste bainhihra populasaun la simu vasina lori imunidade fraku, entaun governante husu ba populasaun atu partisipa vasina tanba dever sidadaun ida-nian hatudu liuhosi bainhihra sidadaun hotu-hotu simu ona vasina, mak sei kombate COVID-19 iha Timor-Leste.
Atu kombate COVID-19 mak ema hotu-hotu voluntáriamente vizita sentru vasinasaun hodi kontribui simu vasina, atu nune’e bele proteje aan, família, suku no komunidade postu adminitrativu Lequidoe no proteje munisípiu Aileu.
Administradór Munisípiu Aileu, Abel da Conceição, husu ba komunidade Suku Betulau simu vasina atu bele kontribui ba munisípiu Aileu nia atinjimentu 80%, nune’e bele kontribui ba nasionál atu Prezidente Repúblika bele deklara katak Timor-Leste sai hosi situasaun Estadu Emerjénsia.
“Hau husu ba ita-boot sira, saúde ne’e importante tanba ne’e labele rona liafuan falsu sira-ne’ebé espalla hela iha ita-boot sira-nia le’et. Maibé, husu atu rona maka administradór postu, xefe suku, xefe aldeia no pesoál saúde sira hodi simu vasina, atu ita-boot sira livremente lori ita-boot sira-nia modo no produtu lokál sira bele ba fa’an ida Dili,” nia dehan.
Nune’e mós, Diretór Servisu Saúde Minisípiu Aileu, Júlio dos Santos, esplika durante ne’e servisu Saúde Minisípiu Aileu halo hela atividade kampaña vasinasaun iha postu adminitrativu haat suku 33 no aldeia 169 iha munisípiu Aileu, tanba alvu ne’ebé Ministériu Saúde fó mai servisu saúde minisipál Aileu tenke atinje hamutuk 31,258, nune’e to’o loron 08 outubru 2021 munisípiu Aileu atinje ona 55%.
“Iha nível postu administrativu Lequidoe, suku Betulau trajetu (alvu) sira tenke atinje 348 no to’o 08 outubru ne’e foin atinje 123. Ida-ne’e hatudu katak partisipasaun komunidade nian sei menus,” Diretór Servisu Saúde Minisípiu Aileu, Julio dos Santos hateten.
Atu atinje alvu ne’ebé iha, daudaun ne’e Servisu Saúde Minisípiu Aileu serbisu maka’as hela ho Administradór munisipiu Aileu, Abel da Conceição, Ministru Asuntu Parlamentár no Komunikasaun Sosiál, Francisco Jerónimo no Sekretáriu Estadu Arte no Kultura, Teofilo Caldas no Sekertáriu Estadu Terra no Propriedade, Mário Ximenes, atu bele apoiu másimu hodi haforsa pesoál saúde sira iha baze.
Jornalista : Francisco Sony
Editór : Cancio Ximenes
