DILI, 11 outubru 2021 (TATOLI)—Konsellu Administrasaun Autoridade Portuáriu Timor-Leste (APORTIL) rekolla reseita hosi servisu portuáriu, hahú fulan janeiru to’o setembru tinan ne’e, hamutuk millaun $2,6.
“Desde Estadu Emerjénsia no serka sanitária, maski atividade portu la’o normál, maibé movimentu mak ladún tanba frekuénsia ró tama mai mós oituan,” Prezidente Konsellu Administrasaun APORTIL, Flávio Cardoso Neves, informa ba Agência TATOLI, iha ninia knaar fatin, Portu Dili, segunda ne’e.
Notísia relevante: Tinan 2020, APORTIL konsege rekolla reseita millaun $2,5
APORTIL halo kalkusaun, iha tinan ne’e nia rohan, bele halibur reseita to’o millaun $3, tanba iha previzaun iha fulan-dezembru atividade portu Dili la’o maka’as tanba lakleur tan Timor-Leste tama ona ambiente normalidade liga ho pandemia.
Reseita ne’ebé hetan mai hosi atividade portu hanesan sasán importasaun nesesidade bázika, karreta no motorizada, materiál konstrusaun, inklui foos hosi empreza privadu ne’ebé sira importa.
“Aleinde importasaun, hetan mós hosi demurrage, ho sistema implementasaun ASYCUDA World ne’ebé di’ak oituan tanba bele hasai sasán ho lalais,” nia akresenta.
Tuir Prezidente APORTIL, daudaun ne’e polítiku autoridade mak oinsá hasai sasán ho lalais hodi garante presu iha merkadu labele sa’e.
“Tanba ne’e maka ha’u haree ho implementasaun sistema ne’e di’ak, kompara ho antes ne’e uza manuál de’it,” nia rekoñese.
Jornalista : Antónia Gusmão
Editora : Julia Chatarina
