DILI, 11 outubru 2021 (TATOLI)—Sala Situasaun, Sentru Integradu Jestaun Krize (CIGC, sigla portugés), rejista kazu pozitivu rua, rekuperadu 16 no kazu ativu 208.
”Kazu foun ohin iha Dili laiha, maibé hosi munisípiu Baucau no Rejiaun Administrativu Espesiál Oé-Cusse no Ambeno (RAEOA) maka iha kazu foun feto rua,’’ Koordenadór Forsa-Tarefa ba Prevensaun no Mitigasaun, Rui Maria de Araújo hateten liuhosi nota ne’ebé Agência TATOLI asesu, segunda ne’e.
Hosi totál kazu detetadu foun ohin, ho idade 20:0 (0%) ho idade entre tinan 12-59 na’in rua (100%), idade 60 laiha. Husi kazu detetadu foun ohin ida, kazu ka 50% sintomátiku (hatudu sintoma).
Kumulativu kazu konfirmadu sura hosi 21 marsu 2020 to’o 11 outubru 2021 hamutuk 19.675. Hosi horisehik mai ohin, teste PCR ne’ebé Laboratóriu Nasionál Saúde halo hamutuk 10, ho detallu hanesan tuir-mai, vijilánsia sentinela laiha, rastreiu ba kontaktu ka Contact tracing laiha, rastreiu aleatóriu ka random Screening na’in hitu, viájen internasionál rua , Follow up iha kuarentena na’in ida.
Totál teste PCR ne’ebé halo horisehik 10 outubru iha munisípiu-sira seluk, RAEOA no HNGV hamutuk 126, ho detalla hanesan Maubisse rua, Maliana tolu, Viqueque rua, Suai haat,Baucau 50, Ermera laiha, RAEOA hitu, HNGV 54, Lospalos haat.
Totál doze vasina ne’ebé fó ona ba populasaun elijível tinan 18 ba leten, to’o ohin dader 10h00, loron 11 outubru tuir sistema informasaun Saúde iha Ministériu Saúde totál kumulativu 1ª doze iha Dili 79,4% no totál kumulativu 2ª doze iha Dili 70,2%.
Enkuantu, ema ne’ebé simu ona vasina doze dahuluk iha Timor Leste 64,4% no simu ona doze daruak 40,6%.
Atubele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-nain epidemiolojia nian uza, maka insidénsia.
Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.
Hosi insidénsia COVID-19 iha Timor-Leste, durante loron hitu ikus maka 0,9/100 mil abitante, enkuantu ba de’it munisípiu Dili 2,0/100 mil abitante.
Enkuantu, iha munisípiu Baucau insidénsia 0,8/100 mil abitante no RAEOA iha insidensia 1,8/100 mil.
“Dadus iha leten hatudu katak insidénsia munisípiu Dili, munisípiu Baucau no RAEOA tuir-tuir malu a’as-liu iha Timor-Leste laran tomak no hatudu risku a’as-liu, atu populasaun hetan da’et, no hada’et tutan virus SARS-CoV-2 iha komunidade nia leet,” Koodenadór Rui Araújo esplika.
Iha loron 11 outubru 2021, izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu na’in 22, ho detallu hanesan grave hamutuk na’in haat, na’in ida uza ventiladór, na’in tolu uza oksijéniu. Moderadu hamutuk ema na’in hitu no kaman ema na’in 11.
Iha 30 setembru, Governu hakotu ona serka sanitária iha munisípiu Dili atu sidadaun sira bele sirkula livremente sai ka tama munisípiu Dili, maibé tenke kumpri regra prevensaun ijiéne pesoál.
Nune’e mós CIGC mós husu ba sidadaun sira kontinua halo teste PCR, bainhira sente moras hanesan isin-manas, mear, kakorok moras ka sintoma seluk ba konsulta iha Sentru Saúde ne’ebé besik.
Notísia Relevante: COVID-19, rekuperadu 34, kazu ativu 279
Jornalista: Felicidade Ximenes
Editór : Florencio Miranda Ximenes
