BOBONARO,11 outubro 2021 (TATOLI)— Kondisaun Eskola Bázika Filiál (EBF) Poerema, aldeia Liabote, suku Miligo, postu administrativu Cailaco, munisípiu Bobonaro, didin de’it ho bebak no kalen uzadu hodi halo prosesu ensinu aprendizajen ba estudante sira.
“Problema ba ami mak kona-ba kondisaun eskola tanba didin de’it ho bebak, ai-rin sira no kalen balu mós komesa aat ona, ne’ebé kondisaun eskola la seguru ona ba ami,” Koodernadór EBF Liabote, Rosalino Mau Pelu, informa ba Agência TATOLI, segunda ne’e.
Komunidade Liabote harii eskola ne’e ho voluntáriu iha 2004 to’o 2009 no 2010 governu liuhosi Projetu Pakote Referendu (PPR) konstrui edifísiu foun ho tipu semi-permanente, ho totál sala tolu.
“Sala tolu ne’e ida ami profesor uza, materiál no livru eskola nia, entaun uza loloos ne’e sala aula rua de’it, dalaruma dezaraska estudante primeiru-anu no segundu-anu ami akumula de’it iha fatin ida mak hanorin, tanba sira ladún barak, dalaruma matéria sei iha ligasaun entaun ami tau hamutuk de’it,” nia haktuir.
Koordenadór ne’e fó-sai katak, problema ne’e akontese kleur ona no aprezenta beibeik relatóriu mensál ba diresaun edukasaun munisípiu Bobonaro, maibé to’o agora seidauk serteza atu reablita ka konstrui eskola refere.
“Governu hatete mai ami dehan atu reablita, até agora seidauk akontese. Ida-ne’e mak ha’u hanesan koordenadór eskola preokupa tebes ho kondisaun eskola ne’e,” nia hateten.
Nia husu ba Ministériu Edukasaun, Juventude no Desportu (MEJD) atu tau kestaun ne’e iha planu prioridade, nune’e estudante sira bele hala’o prosesu aprendizajen ho di’ak no seguru.
Eskola refere akumula estudante kompostu hosi primeiru-anu na’in-16, segundu-anu na’in-17 no terseiru-anu hamutuk na’in-23 ho totál profesór hamutuk na’in-rua.
Jornalista: Sérgio da Cruz
Editor: Evaristo Saores Martins
