COVALIMA, 13 outubru 2021 (TATOLI)—Administrasaun Munisípiu Covalima (AMC), sei halo leilaun motor 62 ho nia kilómetru liu ona istimasaun no karreta lima (5) ho kondisauun aat ba públiku.
“Ami sei halo leilaun ba karreta ho motor. Oras ne’e, sira prenxe ona formuláriu atu selu taxa 10% ba iha nasionál. Kona-ba nia kustu, ha’u labele fó sai, tanba ida-ne’e segredu,” Administradór Munisípiu Covalima, Francisco de Andrade, hateten ba jornalista sira iha nia servisu fatin, Covalima. kuarta ne’e.
Prosesu leilaun ne’e loke ba públiku hodi fó sai avizu iha postu administrativu sira la’ós internu de’it. Depende ba osan tanba se komunidade balun fó orsamentu $200 no balun $250.00 entaun entrega ba komunidade sira-ne’ebé fó osan $250.00, tanba atu rekopera orsamentu sosa motor nian.
Motorizada sira-ne’ebé atu halo leilaun ne’e, mai hosi Servisu Munisípiu Agrikultura, Administrasaun Munisípiu Covalima, postu administrativu, hosi saúde no karreta lima ne’e mai hosi administradór postu administrativu Fatululik, Zumalai no Suai Vila no karreta operasionál rua (2) hosi administrasaun munisípiu la inklui hosi edukasaun munisípiu Covalima tanba tarde.
“Tinan ne’e, ita sosa ona motorizada 15. Ha’u la lembra kompañia nia naran tanba kompañia agora sei trata dokumentu motor nian, hafoin lori ona mai Covalima,” nia dehan.
Jornalista : Celestina Teles
Editór : Cancio Ximenes
