DILI, 13 outubru 2021 (TATOLI)—Reuniaun Konsellu Ministru (KM) ordinária iha kuarta ne’e, membru Governu sira fó hanoin ba malu hodi implementa medida ezekusaun Estadu Emerjénsia da-XVIII, katak funsionáriu sira ne’ebé la vasina labele marka prezensa iha serbisu fatin.
“Tuir regra ezekusaun medida Estadu Emerjénsia, husu ministru sira atu impoin rekezitu ka regra sira iha ministériu no instituisaun sira hotu, liliu ba funsionáriu sira, ne’ebé funsionáriu atu mai serbisu tenke vasina, maibé sé la vasina tenke hatudu prova rezultadu teste swab COVID-19 kada semana, nune’e komprova katak livre hosi vírus ne’e,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu ne’e iha Palásiu Governu.
Notísia relevante: Medida ezekusaun EE da-XVIII iha alterasaun tolu
Desizaun ne’e nu’udar opsaun alternativa ida hodi proteje-an no proteje ema seluk iha fatin serbisu hodi kontra surtu COVID-19.
“Sé de’it mak la vasina, superior sira la autoriza funsionáriu ne’e ninia prezensa iha fatin serbisu no laiha rezultadu swab ho negativu labele ba prezensa, kuandu la prezensa iha fatin serbisu entaun falta no bainhira falta iha dalan rasik tuir lei atu fó sansaun ruma ba funsionáriu hirak ne’ebé falta,” nia akresenta.
To’o tersa ne’e, Sala Situasaun, Sentru Integradu Jestaun Krize (CIGC, sigla Portugés) rejista kazu pozitivu foun neen (Dili haat no Bobonaro rua), rekuperadu 52 no kazu ativu 162.
Enkuantu, kazu detetadu foun tersa ne’e ho idade 20 laiha (0%), ho idade entre tinan 12-59 na’in-lima (83,3%), idade 60 ba leteb na’in-ida, ne’ebé husi kazu detetadu foun ne’e, haat hanesan sintomátiku reprezenta 66,6%.
Kazu kumulativu konfirmadu hahú loron 21 marsu 2020 to’o 12 outubru 2021 hamutuk 19.681, hosi horisehik mai ohin, Laboratóriu Nasionál Saúde halo teste PCR 122, vijilánsia sentinela laiha, rastreiu ba kontaktu laiha, rastreiu aleatóriu na’in-40, viájen internasionál 14 , follow up iha kuarentena na’in-69.
Totál teste PCR ne’ebé halo segunda (11/10) iha munisípiu-sira seluk, hanesan Rejiaun Administrativa Espesiál Oeé-cusse Ambeno (RAEOA) no Hospital Nacional Guido Valadares (HNGV) hamutuk 126, munisípiu Maubisse na’in-tolu, Maliana 12, Viqueque lima, Suai 20, Baucau 56, Ermera ida, RAEOA 13, HNGV 67, Lautém 15.
Jornalista : Antónia Gusmão
Editora : Julia Chatarina