OÉ-CUSSE, 13 outubru 2021 (TATOLI)—Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, tersa horisehik lansa fatuk-dahuluk ba projetu rekonstrusaun unidade rua iha suku Bene-Ufe, sub-rejiaun Nítibe.
Projetu rekonstrusaun unidade rua ne’e ida iha natar Soko, aldeia Manan ezekuta hosi empreza Loroti’as Unipesoál, Lda, ho medida naruk metru 1000, ho nia valór $266.001.40.
Nune’e mós ida iha natar Baoknana ezekuta hosi empreza Inur Sakato Unipesoál, Lda, ho medida naruk metru 150, ho valór kontratu $50.507.06 no durasaun serbisu durante loron-120, perténsia ba suku Bene-Ufe, sub-rejiaun Nítibe.
Prezidente Autoridade RAEOA, Arsénio Paixão Bano, informa objetivu harii projetu Gabiaun hirak-ne’e atu proteje komunidade nia patrimóniu agrikultura, liuliu área produtivu sira-ne’ebé hetan estragu iha dezastre naturál liubá.
“Ita lansa projetu rua iha Nítibe, projetu rekonstrusaun rua ne’e importante tebes atu proteje komunidade sira-nia área produtivu, tanba akontese dezastre naturál, afeta komunidade nia natar falla kolleta no to’os rai-maran mós hetan estragu, entaun liuhosi serbisu agrikultura identifika suku Bene-Ufe presiza apoiu fasilidade gabiaun, antes udan monu-rai,” Arsénio Paixão Bano informa ba Agência TATOLI, iha Oé-Cusse, kuarta ne’e.
Nune’e mós projetu rekonstrusaun gabiaun iha sub-rejiaun Nitibe, autoridade RAEOA estabelese mós projetu ba edukasaun, harii edifísiu eskola foun iha suku Bene-Ufe, suku Suni-Ufe no suku Ban-Afi.
Projetu perfurasaun bee-moos konstrui iha suku Lela-Ufe no suku Suni-Ufe, projetu hosi setór Saúde harii fasilidade Saúde iha suku Bene-Ufe aldeia Manan, nomoos programa Food for Work proteje bee-matan sira iha territóriu Nítibe.
“Oé-Cusse projetu barak, serbisu sei la para tanba Oé-Cusse tenke ba oin, tanba ne’e ha’u husu komunidade servisu ho fuan no laran, nune’e ita hamutuk lori Oé-Cusse ba oin. Oé-Cusse labele terus ba bee-moos, labele terus tanba hamlaha, autoridade nia mehi ida de’it, tenke dezenvolve ita-nia rai rasik,” nia fó hanoin.
Nia apela ba lideransa komunitáriu iha sub-rejiaun Nítibe fiskaliza beibeik obra hirak-ne’e labele hetan estragu, tanba autoridade hakarak dudu dezenvolvimentu to’o área rurál ho kualidade tuir padraun internasionál, tanba gasta osan Estadu nian.
Nia apela mós ba empreza sira atu aselera projetu hirak-ne’e bazea ba kontratu ne’ebé mak iha ona, tanba udan besik monu rai ona.
Xefe suku Bene-Ufe, Marcos Meni, agradese ba autoridade RAEOA tanba apoia ona obra protesaun ba komunidade iha suku Bene-Ufe, tanba akontesimentu dezastre naturál iha 4 abríl, suku Bene-Ufe hetan afetasaun grave, rezulta natar sira falla kolleta no mota estraga to’os rai- maran.
“Ha’u fiar, projetu gabiaun halo lansamentu ne’e sei kualidade ba komunidade suku Bene-ufe atu uza to’o tinan barak,” lidér lokál ne’e akresenta.
Sekretáriu Rejionál Asuntu Agrikultura, José Eta, informa, projetu rekonstrusaun unidade 14 maka sei proteje área produtivu sira hamutuk fatin 449, perténsia suku 10 iha territóriu Oé-Cusse nian.
Entretantu, Iha tinan 2021, autoridade RAEOA loke konkursu públiku ba projetu rekonstrusaun gabiaun hamutuk unidade 20, kobre ba sub-rejiaun Oésilo, Nítibe no Pante Makassar ho nia montante orsamentu hamutuk millaun $2-resin hosi Orsamentu Jerál Estadu (OJE) 2021 atu rekupera hikas estragus ne’ebé akontese iha 4 abríl liubá.
Notísia relevante:Arsénio Bano hatuur fatuk-dahuluk ba projetu rekonstrusaun Gabiaun
Jornalista : Abílio Elo Nini
Editór : Evaristo Soares Martins
