BAUCAU, 13 outubru 2021 (TATOLI)—Koordenadora Jerál Eskola Ensinu Báziku Filiál (EBF) iha suku Ossouala, postu administrativu Vemasse, munisípiu Baucau, Laura de Fátima Correia, informa programa merenda eskolár agora implementa fila-fali ona iha eskola refere.
Notísia Relevante: Sala aula iha EBF Ossouala limitadu
Programa ne’e implementa fali tanba Eskola Báziku Filiál (EBF) Ossouala, hetan ona transferénsia orsamentu hosi Ministériu Edukasaun Juventude no Desportu (MEJD) munisipál.
“Iha fulan ne’e nia laran, ita hetan ona transferénsia orsamentu hosi edukasaun munisípiu, nune’e agora kontinua implementa programa merenda eskolár,” Koordenadora ne’e hateten ba Agência Tatoli iha Ossouala, Vemasse, Baucau, kuarta ne’e.
Nia informa, osan ne’e transfere uluk ba fulan ida-nian ne’ebé bazea ba númeru estudante no kada estudante ida loron ida merenda ho osan 0,25 sentavu, ho menu merenda hanesan paun, susu-been, hahan produtu lokál hanesan fehuk no seluk tan inklui han sasoro no etu ho naan.
“Prosesu aprendizajen hahú hosi tuku 8h00 to’o 12h00 meudia. Merenda eskolár ne’e implementa iha tuku 09h50 iha oras intervalu,” nia dehan.
Iha EBF Ossouala, estudante primeiru silklu no segundu siklu hamutuk na’in-150 no profesór sira-ne’ebé hanorin iha eskola refere hamutuk na’in-ualu (8).
Koordenadora EBF, Laura de Fátima Correia, hateten durante situasaun COVID-19 ne’e, estudante sira feriadu no laiha aula prezensiál tanba Governu implementa serka sanitária.
Hafoin Governu hakotu serka sanitária no re-ativa falu aula prezensiál ne’e, estudante besik ema na’in-20 la mai fali tuir aula prezensiál no estduante barak mak lahatene hakerek fali.
“Ami preokupa ho estudante besik na’in-20 mak la mai fali tuir aula prezensiál inklui sira-ne’ebé tama eskola maibé balun hakerek la hatene. Situasaun COVID-19 ne’e, halo labarik barak mak sai lahatene hakerek,” nia dehan.
Notísia Relevante: EUA apoiu $40.000 ba programa merenda eskolár
Jornalista : Nelson de Sousa
Editór : Cancio Ximenes
