DILI, 13 outubru 2021 (TATOLI)–Ministériu Edukasaun, Juventude no Desportu (MEJD) deside lansa vasina Pfizer ba estudante idade 12 to’o 17 iha munisípiu Dili, Baucau no Bobonaro.
Vise-Ministru Edukasaun, Juventude no Desportu, António Guterres, hateten, parte ministériu iha ona kompromisu atu kontinua apoiu Ministériu Saúde (MS) alkansa programa vasinasaun ba labarik sira atu prevene hosi moras.
“Ha’u iha ona dadus estudate iha munisípiu Dili, tanba ne’e ita bele prepara ona lansamentu ba munisípiu Dili iha tempu besik, hafoin hakat tan ba munisípiu rua seluk,” Vise-Ministru hateten iha salaun INFORDEPE, Balide, kuarta ne’e.
MEJD rejista ema ho idade 12 to’o 17 hanesan estudante no laós estudante iha munisípiu Dili purvolta 41.000 mak sei simu vasina, enkuantu ekipa nafatin atualiza dadus iha munisípiu Baucau no Bobonaro.
Tuir planu MS sei lansa vasina Pfizer doze dahuluk iha Dili iha loron 25 outubru, ne’ebé antes ne’e inan-aman sei asina karta aseitasaun hodi fó autorizasaun ba oan sira simu vasina, tanba vasina ne’e laós obrigatóriu.
Notísia relevante: 25 outubru, MS lansa vasina Pfizer doze dahuluk
Daudaun Diretór Servisu Edukasaun munisípiu Dili no Diretór Jerál Ensinu Sekundáriu hahú prepara kondisaun no koordena malu ho inan-aman.
Tuir dadus ne’ebé MEJD rekolla iha territóriu nasionál, iha estudante purvolta 393.668 hosi nível pre-eskolár, ensinu báziku, ensinu sekundáriu jerál no tékniku vokasionál, ne’ebé hosi dadus ne’e, estudante ho idade 18 ba leten purvolta 50.000-resin.
Jornalista : Tomé amado
Editora : Julia Chatarina
