COVALIMA, 13 outubru 2021 (TATOLI)—Servisu Munisípál Agrikultura Covalima, tinan ne’e sei loke natar foun ektare 80-100 iha suku Raimea, postu administrativu Zumalai, munisípiu Covalima
“Ita esforsu tinan ne’e bele loke tan área foun kuaze ektare 80 to’o 100. Ita hein laiha difikuldade no kondisaun tratór di’ak no manutensaun rutina bele la’o di’ak nafatin, nune’e bele utiliza tratór sira-ne’e hodi loke natar foun ne’e,” Diretór Servisu Munisipál Agrikultura, Zeferino A. Guterres, informa ba Agência Tatoli iha Sentru Tratór Sanfuk, Covalima, kuarta ne’e.
Nia hateten, SMAC iha ona planu no sei esforsu hodi haree kondisaun tratór nian tanba kuaze tinan 10 liu ona mak tratór sira-ne’e halo operasaun, hodi atende agrikultóra sira atu fila-rai to’os nian no halai natar. Maske, kustu manutensaun aumenta ba beibeik maibé profisionál mekániku sira buka maneira tenta hadi’a nafatin.
Tratór iha Munisípiu Covalima hamutuk 30 maibé hosi númeru ne’e lima (5) tama ona ba prosesu leilaun iha tinan kotuk no tratór lima (5) mak kompañia presiza halo manutensaun, nune’e iha Covalima hela tratór 20 mak kondisaun diák no halo hela operasaun.
“Iha semana rua liubá, ita halo manutensaun rutina hodi troka óliu hodi prepara fila-rai ba époka ida-ne’e, no hodi koloka tratór ba postu administrativu Tilomar, Maucatar, Suai Vila no Zumalai,” nia dehan.
SMAC koloka ona tratór tanba tama ona époka tinan 2022 haree liubá produtu batar iha fulan novembru, époka kultivasaun ba tinan 2022 hahú prepara rai ba kultivasaun ba époka primeiru 2022 ba natar.
“Ita prepara rai ba kultivasaun ba époka primeiru 2022 ba natar iha Raimea, Zumalai. Ita identifika ona prosesu intenfisikasaun servisu haluan tan natar mós la’o hela,” nia dehan.
Xefi Suku Raimea, postu administrativu Zumalai, Munisípiu Covalima, Januário Nahak, hateten komunidade iha suku Raimea prontu atu oferese rai iha área Oebaba ba Governu tanba rai barak mak sei abandona no komunidade hakarak atu loke luan tan natar foun ba sira.
“Komunidade iha suku Raimea prontu atu ofrese rai ba Governu tanba rai barak mak sei abandona. Depende ba volume bee sufisiente ne’e, komunidade hakarak atu loke tan natar foun,” nia dehan.
Jornalista : Celestina Teles
Editór : Cancio Ximenes
