COVALIMA, 14 outubru 2021 (TATOLI)—Vise Ministru Edukasaun Juventude no Desportu (MEJD), António Guterres ho nia ekipa realiza kampañia vasinasaun hodi enkoraja komunidade iha suku Belekasak, aldeia Gazolo, sub-aldeia Has Ain, postu administrativu Maucatar, munisípiu Covalima atu simu vasina.
Notísia Relevante: Taxa kobertura vasinasaun iha Covalima atinje ona 79,1%
“Ho ami-nia prezensa iha ne’e, kobertura númeru vasina ba doze dahuluk no doze daruak munisípiu Covalima okupa segundu lugar iha nivel nasionál. Ha’u enkoraja komunidade hakat ba sentru vasinasaun, atu simu vasina tanba vasina mak úniku dalan ida atu bele kombate COVID-19 iha Covalima no Timor-Leste,” Vise MEJD António Guterres liu hosi nia diskursu bainhira hala’o kampaña vasinasaun, kinta ne’e.
Nia informa, iha Belekasak, númeru alvu vasinasaun loloos na’in-1.825 maibé bazea ba dadus komunidade simu vasina doze dahuluk foin 300-resin no ba doze daruak foin mak na’in 42-49 hanesan ne’e.
“Ami-nia prezensa iha ne’e, la’ós haree de’it ba komunidade ne’ebè seidauk vasina maibé fó hanoin mós ba abitante sira-ne’ebè mak vasina ona doze dahuluk hodi haree data ne’ebè mak atu ba simu vasina doze daruak nian, di’akliu ba vasina, nune’e bele salva an, salva família no salva nasaun,” nia dehan.
Governante ne’e husu ba komunidade ne’ebè rona informasaun kona-ba importánsia hosi vasina ne’e, atu fahe-tutan informasaun ba komunidade sira-ne’ebè seidauk simu vasina atu hakbesik an ba sentru votasan simu vasina.
Xefi Suku Belekasak, Leonito Gusmão, sente orgollu ho prezensa Vise-Ministru MEJD António Guterres apoiu no disemina informasaun kona-ba importánsia hosi vasinasaun hodi kontra COVID-19 iha aldeia Gazolo.
Komunidade aldeia Gazolo nia totál hamutuk na’in-700 no 85% hosi idozu na’in-40 ne’e, ema na’in-20 mak vasina ona no na’in-20 mak seiduak simu tanba moras komplikadu.
Tuir Agência Tatoli nia observasaun, prezensa Vise- Ministru António Guterres ne’e, konsege konvense komunidade na’in-12 hakatk ba sentru votasaun hodi simu vasina doze dahuluk no na’in-rua (2) simu vasina doze daruak.
Jornalista : Celestina Teles
Editór : Cancio Ximenes
