OÉ-CUSSE, 15 outubru 2021 (TATOLI)— Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, sesta ne’e fó pose ba membru Konsellu Konsultivu na’in-hitu (7), hodi kontribui reforsa liña koordenasaun iha enklave ne’e.Mandatu membru konsellu konsultivu na’in-hitu (7) ne’e sei termina bainhira Prezidente Autoridade hakotu mandatu. Membru konsellu konsultivu hirak-ne’e mai hosi eis membru Governu na’in-ida (1). Nune’e mós reprezenta forsa seguransa nasaun na’in-ida (1), reprezentante xefe suku sira na’in-ida (1) ne’ebé reprezenta suku 18, reprezentante lia-na’in rua (2) no reprezentante munisípiu na’in-rua (2).
“Ohin, Oé-Cusse marka istória foun tanba Prezidente Autoridade kumpri nia obrigasaun tuir lei númeru 3/2014 artigu 23 kona-ba harii konsellu konsultivu ba rejiaun no Prezidente Autridade mak nomea no fó pose,” Bano ko’alia iha edifísiu RAEOA, ZEESM Oé-Cusse.
Papél hosi konsellu konsultivu tuir artigu 23 lei númeru 3/2014 (Kriasaun RAEOA), atu fó konsellu ba Prezidente Autoridade ba asuntu importante ne’ebé maka iha ligasaun ho lala’ok dezenvolvimentu rejiaun nian.
Prezidente Autoridade RAEOA ne’e konvida reprezentante xefe suku hosi suku-18 no xefe suku Costa mak reprezenta suku 18 ne’e, konvida mós eis Eis-vise-Ministru Administrasaun Estatál, José Tanesib Anuno, no sei konvida mós lia-na’in ida maibé daudaun ne’e sei iha faze konsultasaun.
Tuir ajenda ne’ebé iha sei deskuti projetu toponímia kona-ba naran ba estrada, ponte no fatin públiku sira iha sub-rejiaun Pante Makassar.
“Importante tebes kuandu ita halo ona dezenvolvimentu iha Oé-Cusse, importante tanba hahú ona transparánsia Prezidente Autoridade bele nakloke-aan ba povu tomak, liuhosi konsellu konsultivu nune’e hamutuk kontribui ideia molok hola desizaun ba asuntu importante sira,” nia dehan.
Membru konsellu konsultivu hirak-ne’e simu pose iha faze dahuluk ne’e maka hanesan, José Tanesib Anuno hanesan eis membru Governu, Mateus Mendes Asunção nu’udar komandante PNTL-RAEOA reprezenta forsa seguransa nasaun.
Nune’e mós jestór sub-rejiaun Pásabe Anton Ulan reprezenta munisípiu hamutuk ho jestór sub-rejiaun Nítibe Manuel Tolan, xefe suku Costa, Aleixo Abi reprezenta xefe suku 18 iha RAEOA. Purtantu falta lia-na’in rua (2) tanba sei iha faze konsultasaun.
Tuir lei númeru 3/2014 kona-ba kriasaun Rejiaun Administrativa Espesiál Oé-Cusse Ambeno no estabelese Zona Espesiál Ekonomia Sosiál Merkadu (RAEOA-ZEESM), artigu 23 (Konsellu Konsultivu), númeru 1 hateten, konsellu konsultivu nu’udar órgaun ne’ebé koadjuva ba Prezidente Autoridade iha toma desizaun. Konsellu konsultivu mak orgaun ne’ebé fó tulun ba Prezidente Autoridade hodi foti desizaun.
Númeru 2 hosi artigu ne’e dehan, konsellu konsultivu ne’e prezide hosi Prezidente Autoridade no hasoru malu iha sorumutu pelumenus fulan-ida dala-ida.
Númeru 3 hosi artigu ne’e mensiona, Prezidente autoridade tenke hala’o konsulta konsellu konsultivu molok nia foti desizaun importante nomoos define regulamentu administrativu rejionál, regra ne’e la aplikável bainhira Prezidente hakarak hala’o nomeasaun no ezonerasaun ba pesoál ka no sansaun disiplinár sira seluk.
Númeru 4 hosi artigu ne’e mensiona, konsellu konsultivu, tuir ninia inisiativa própria ka tuir pedidu Prezidente Autoridade nian, iha prosesu orsamentu nian, fó tulun ba elaborasaun orsamentu no mós hato’o paresér no opiniaun kona-ba ezukusaun ba planu.
Númeru 5 hosi artigu 23 ne’e esplika, Prezidente autoridade ne’e tenke aprova rejimentu internu husi konsellu konsultivu iha sorumutu dahuluk husi konsellu konsultivu ne’e.
Jornalista : Abílio Elo Nini
Editór : Evaristo Soares Martins
