DILI, 15 outubru 2021 (TATOLI)— Arsebispu Arkedioseze Metropolitana Dili, Don Virgílio do Carmo da Silva, informa, Igreja Katolika iha Timor-Leste seiduak simu komunikasaun ofisiál hosi Vaticano, kona-bá vizita Amu Papa Francisco atu vizita Timor-Leste iha 2022.
“To’o agora buat hotu sei ko’alia de’it , maibé seidauk iha komunikasaun ofisiál ida mai hosi Vaticano, kona-ba sá data no tinan atu Amo Papa Francisco mai vizita Timór,” Don Virgílio, informa, iha Kuartel Jerál PNTL, Caicoli, kinta ne’e.
Notísia Relevante: Reprezentante Santa Sé husu PM enkoraja populasaun simu vasina
Maski, Don Virgílio dehan iha duni planu atu Amo Papa vizita Timor-Leste, maibé seidauk iha komunikasaun ofisiál hosi Vaticano ba Igreja Katólika iha Timor-Leste.
Nune’e, Igreja Katolika deside seidauk halo preparasaun hodi simu vizita líder uma-kreda mundiál ne’e.
“kona-ba preparasaun seidauk la’o tanba Santo Padre mai la’ós mai Timór de’it, maibé sei liu nasaun seluk,” nia afirma.
Entretantu, Laureadu Prémiu Nobel ba Pás, José Ramos Horta, halo enkontru formál ho Santo Padre Francisco iha Basílica São Pedro, Vaticano tanba sai ekipa júri ba prémiu Zayed ba Fraternidade Umana.
Hafoin fila hosi Vaticano, Ramos Horta informa, Amu Papa konfirmadu atu vizita Timor-Leste iha tinan 2022.
Jornalista: Natalino Costa
Editór: Florencio Miranda Ximenes
