COVALIMA, 15 outubru 2021 (TATOLI)—Lia-na’in uma lisan Napelai ho volontariamente oferese fatin ba Governu liu-liu Vise-Munistru Juventude no Desportu hodi realiza kampañia vasinasaun iha Suku Belekasak, aldeia Lolowa, postu administrativu Maukatar, munisípiu Covalima.
“Ha’u nu’udar lia-na’in uma lisan Napelai, hafoin simu informasaun hosi xefe suku katak Vise-Munistru Edukasaun no Desportu António Guterres atu realiza kampañia vasinasaun, voluntáriamete ha’u ofrese fatin ba ita-nia membru Governu atu realiza kampañia vasinasaun,” Xefe Adat Uma lisan Napelai, Bernardino Mendonça, bainhira dadalia ho Agência Tatoli, iha suku Belekasak, aldeia Lolowa, postu administrative Maucatar, sesta ne’e
Nu’udar sidadaun, nia dehan, tenke oferese fatin no apoiu Governu nia programa kona-ba vasinasaun, nune’e komunidade bele rona loloos informasaun kona-ba importánsia hosi vasina ne’e.
Maske iha ema balun ne’ebé influensia nia atu labele vasina tanba simu vasina ne’e sei mate sedu no laiha ona oan, maibé nia parte la fiar hodi kontribuui no simu vasina, tanba programa Governu ne’e di’ak no imposivel Governu oho fali ninia povu ho vasina.
“Bainhira ha’u rona informasaun Vise-Ministru Edukasaun Juventude no Desportu atu disemina informasaun importánsia vasina voluntariamente ha’u ofrese fatin,” nia hateten.
Vise-Ministru Juventude no Desportu, António Guterres, agradese ba lia-na’in uma lisan Napelai hakarak ofrese fatin hodi realiza kampaña vasinasaun iha aldeia Lolowa.
Nune’e mós, Responsável Kampaña Vasinasaun Covalima, Alípio Gusmão Lopes, uma lisan Napelai oferese fatin ida-ne’e belé halibur malu no vise-ministru bele disemina informasaun kona-ba importánsia COVID-19 iha fatin ida-ne’e.
“Ha’u agradese ba lia-na’in hosi uma lisan Napelai ne’ebè oferese fatin, no ohin loron ita bele mai halibur malu iha ne’e hodi rona informasaun direta hosi governante kona-ba importánsia hosi vasina ne’e,” nia dehan.
Jornalista : Celestina Teles
Editór : Cancio Ximenes
