DILI, 16 outubru 2021 (TATOLI)—Sala Situasaun, Sentru Integradu Jestaun Krize (CIGC, sigla portugés) relata dadus atuál COVID-19 ba loron ohin, ne’ebé rejista kazu foun haat, kompostu hosi Dili tolu no munisípiu seluk ida, óbitu laiha, rekuperadu sia no ativu ne’ebé baixa hela iha sentru izolamentu hamutuk 98.
Nune’e, totál konfirmadu komulativu iha Timor-Leste hahú hosi loron 21 marsu 2020 to’o ohin loron hamutuk 19.707 no komulativu óbitu 119.
Totál kazu detetadu foun, kompostu hosi mane tolu no feto ida, ho idade 20 ba kraik laiha, idade entre 12-59 iha na’in-tolu no idade 60 ba leten ida na’in-ida, nune’e kazu tolu (75%) hanesan sintomátiku (hatudu sintoma) no hosi detetadu foun ida de’it mak simu vasina doze dahuluk maibé tolu seluk seidauk simu vasina kompleta.
“Númeru kazu detetadu foun nafatin reduzidu no kazu rekuperadu barak-liu kazu detetatu foun,” Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste hosi CIGC, Rui Maria de Araújo, relata liuhosi nota ne’ebé Agência TATOLI asesu, sábadu ne’e.
Aleinde ne’e, ema ne’ebé hala’o tratamentu ospitalizadu reduzidu, enkuantu, munisipiu neen laiha ona kazu ativu no munisípiu neen inklui Rejiaun Administrativa Espesiál Oé-cusse Ambeno (RAEOA) sei iha kazu esporádiku.
Nota hosi CIGC rela mós katak kobertura vasina kompletu iha munisípiu Dili liu ona 70%.
Iha parte seluk, totál testes PCR ne’ebé halo horiseik, loron 15 uutubru iha munisipiu sira seluk, REAOA no Hospital Nacional Guido Valadares (HNGV) hamutuk 166, kompostu hosi Baucau 46, Ermera laiha, Maliana ualu, Maubisse neen, RAEOA 12, Covalima 11, Viqueque laiha, Lautém laiha, HNGV 82, Vera Cruz ida.
“Totál teste PCR iha oras 24 ikus iha 239, ne’ebé hatudu taxa pozitividade tun 1,6%, kompara ho semana kotuk, loron 09 de outubru, taxa pozitividade 5,1%,” Koordenadór CIGC subliña.
Jornalista : Arminda Fonseca
Editora : Julia Chatarina
