BAUCAU, 16 outubru 2021 (TATOLI)-–Kaixa klandestina tolu hosi suku Ossuala, postu administrativu Vemasse, munisípiu Baucau, ofisiálmente entrega ona dokumentu rezisténsia iha luta libertasaun, ba Arkivu no Muzeu Rezisténsia Timorense (AMRT).
Kaixa tolu mak hanesan Oe-Dolar, Sadere, no Zona Soko, ne’ebé entrega dokumentu rezisténsia kona-ba envolvimentu iha luta rezisténsia ligadu ba kaixa ne’e, ho ninia lala’ok no prosesu tomak no ligasaun ho ai-laran, karta korrespondénsia no seluk tan.
“Agradese ba responsável kaixa hotu, ne’ebé depozita hodi entrega dokumentu rezisténsia ba AMRT, ami sei asegura hanesan osan mean iha muzeu hodi halo tratamentu prezervasaun ba istória,” Diretór Ezekutivu no Prezidente AMRT, Hamamar Antoninho Baptista Alves, hateten, iha ninia diskursu, iha sede suku Ossuala, sábadu ne’e.
Notísia relevante: Responsável kaixa Alfa 7 fó sasin involvimentu luta rezisténsia ba AMRT
Serimónia ne’e hala’o liuhosi asinatura termu entrega, hosi responsável kaixa tolu no Diretór Ezekutivu AMRT.
Aleinde ne’e, iha mós membru sira hosi kaixa seluk hanesan Fitun Naroman, Unidade Alfa/7, Loriko Cami, Zona Matan Bulak, Sacra no Direjente Halibur, ne’ebé entrega dokumentu indíviduu balun ba AMRT.
Biban ne’e, Hamamar Antoninho, agradese ba responsável sira hotu, ne’ebé iha vontade, konfiansa no hanoin hakarak asegura istória ne’ebé kontribui durante ekipa AMRT semana rua iha Ossuala, hodi rekolla dokumentu no halo entrevista.
Aleinde ne’e, ARMT agradese ba komunidade no autoridade lokál iha suku, ne’ebé fó ona apoiu tomak durante halo serbisu.
Arkivu no Muzeu hanesan mahon ne’ebé mai hosi estatutu antigu kombatente artigu 36 ho 37, ne’ebé ko’alia kona-ba atu harii arkivu no muzeun ba rezisténsia no iha estatutu AMRT rasik harii nu’udar institutu públiku ho karatér espesiál hodi halo tratamentu dokumentu rezisténsia, ho misaun ho objetivu atu prezerva memória istória luta pasada.
Timor-Leste hamrik ho sofrimentu barak no nia arkivu la organizadu no laiha fatin atu rai arkivu, tanba ne’e hirak ne’ebé envolve iha prosesu, sai hanesan responsável ne’ebé iha korrajen fó vida tomak ba funu-na’in sira no salva dokumentu.
Tanba ne’e, Estadu harii AMRT ho hanoin atu konvida hirak ne’ebé envolve iha prosesu luta libertasaun, hodi fó importánsia ba luta-na’in nia sofrimentu, nune’e bele rekolla no arkiva dokumentu sira.
Preokupasaun Estadu nian mak atu salva dokumentu rezisténsia, tanba dokumentu sira iha frazilidade no fízikamente la seguru.
“Ita hahú rekolla dokumentu ho apoiu Prezidente Repúblika nia polítika, ne’ebé Xefe Estadu rasik hanesan luta-na’in, husu apoiu hosi instituisaun internasionál ida hosi Portugal, ne’ebé hahú rekolla dokumentu rezisténsia iha tinan 2002,” Diretór Ezekutivu AMRT haktuir.
Polítika Estadu mak atu harii muzeu, ho ninia preámblu atu valoriza veteranu no ninia partisipasaun tomak atu prezerva istória, nune’e asegura faktu ne’ebé mak iha kona-ba luta.
Koronel, Domingos da Camara ‘Amiku’, ne’ebé iha tempu rezisténsia serbisu ativu iha ligasaun ho rede kaixa, konsidera importante tebes AMRT rekolla dokumentu, nune’e bele prezerva istória.
Serimónia entrega ne’e partisipa hosi Vise Prezidente Konsellu Kombatente Libertasaun Nasionál, Mario Nicolau dos Reis ‘Marito Reis’, veteranu, autoridade postu no munisípiu Baucau, autoridade lokál, membru no responsável kaixa klandestina no komunidade lokál.
Jornalista : Nelson de Sousa
Editora : Julia Chatarina
