VIQUEQUE, 18 outubru 2021 (TATOLI)—Eskola Bázika Filiál (EBF) Ualaque, ne’ebé lokaliza iha aldeia Sana, suku Uaitame, postu administrativu Uatulari, munisípiu Viqueque, durante ne’e hasoru difikuldade iha prosesu aprendizajen aula prezensiál tanba falta kadeira, meza no livru ba estudante sira.
“Estudante sira tuur de’it iha rai mak tuir prosesu aprendizajen tanba kadeira no meza laiha. Livru limitadu tebes hodi hanorin estudante sira,” Koodenadór EBF Ualaque, Benceslão Martins, informa ba Agência TATOLI, iha suku Sana, segunda ne’e.
Eskola ne’e harii iha tinan 2000, maibé to’o agora laiha meza no kadeira, enkuantu parte eskola antes ne’e halo ona proposta ba nível munisipál maibé to’o agora seidauk iha resposta.
“Ami halo beibeik proposta ba Ministériu Edukasaun, Joventude no Desportu (MEJD) maibé laiha resposta ruma mai ami. EBF Ualaque hosi Eskola Bázika Sentrál (EBC) Naedala nian,” nia akresenta.
Daudaun ne’e estudante hosi primeiru no segundu siklu iha eskola ne’e hamutuk na’in-64, profesór permanente haat no sala aula tolu.
Tuir Resposável eskola, maski falta fasilidade, maibé profesór no estudante la lakon vontade no nafatin ativu iha aula prezensiál.
Enkuantu, kona-ba livru, tinan-ida mak Servisu Edukasaun haruka revista Lafaek mai eskola ne’e.
“Ami-nia eskola iha área remota liu, tanba ne’e difikulta movimentu,” nia dehan.
Notísia relevante: Governu Sei Sosa Karteira Rihun 35 Fahe Ba Eskola iha Timor
Antes ne’e, MEJD planeia atu sosa kadeira no meza hamutuk 35.000 hosi Institutu Bambú Tibar I.P hodi fahe ba eskola sira ne’ebé sei menus kadeira no meza, tanba identifika katak iha eskola 1.000 iha territóriu nasionál mak falta karteira.
Jornalista : Vitorino Lopes da Costa
Editora : Julia Chatarina
