Governu agradese apoia parseiru internasionál rezolve situasaun kalamidade

October 18, 2021
10:12 PM
Facebook Instagram X WhatsApp Telegram

SEPS, Joaquim José Gumão dos Reis Martins no Kordinatór Rezidénsia UN iha Timor-Leste, Roy Trivedy, hala'o enkontru auto nivel ho Embaixadór no parseiru internasionál sira. Iha Kampaun UN Caicoli, segunda (18/10). Imajen Tatoli/Francisco Sony

DILI, 18 outobru 2021 (TATOLI)— Governu liuhosi Sekretária Estadu Protesaun Sívil (SEPS), halo reuniaun nivél altu ho parseiru internasionál no diplómatiku sira hodi agradese no kongratula apoia sira bainhira Timor-Leste enfreta situasaun kalamidade públika.

“Ita kongratula no agradese sira nia esforsu no apoiu umanitariu sira iha situsaun kalamidade foin dadaun akontese iha Timor-Leste,” Sekretáriu Estadu Protesaun Sivíl (SEPS), Joaquim Gusmão Martins, hateten iha Kampaun UN-Caicoli, segunda ne’e.

Iha reuniaun ne’e, Organizasaun Nasaun Unida (ONU) no Parseiru Internasionál kompromete kontinua apoiu Timor-Leste bainhira hasoru situasaun defisil.

“Ita nia parseiru sira kontinua iha kompromisu atu ajuda Governu Timor-Leste bainhira enfreta situsaun emerjénsia sira,” Governante ne’e haktuir.

Iha biba hanesan, Reprezentate Organizasaun Nasaun Unida (ONU) iha Timor-Leste, Roy Trivedy, hateten, nia parte hamutuk ho korpu diplomátiku no parseiru internasionál sira iha Timor-Leste iha kompromisu kontinua ajuda Governu Timor-Leste iha situasaun emerjénsia.

“Ami komitementu hodi ajuda Governu Timor-Leste hodi responde situasaun defisil sira,” nia kompromete.

Jornalista : Natalino Costa

Editór : Florencio Miranda Ximenes