COVALIMA, 18 outubru 2021 (TATOLI)—Vise Ministru Edukasaun Juventude no Desportu, António Guterres, husu ba joven sira atu servisu hamutuk ho autoridade lokál enkoraja komunidade hakat ba sentru vasinasaun atu simu vasina.
Notísia Relevante: Komunidade Belekasak antuziasmu simu vasina
“Joven sira iha aldeia Busadoa, ha’u husu imi servisu hamutuk ho autoridade lokál no husu mós profesór sira-nia tulun atu fahe tutan informasaun kona-bá vasina ne’e. Ita hamutuk hodi salva sira-nia vida no kuidadu sira-nia família liuhosi simu vasina,” António Guterres hateten liuhosi nia diskursu iha kampaña vasinasaun ne’ebé hala’o iha aldeia Busadoa, suku Belekasak, postu administrativu Maucatar, segunda ne’e.
Governante ne’e mós enkoraja komunidade hakbesik ba sentru vasinasaun hodi simu vasina no labele fiar informasaun falsu iha li’ur kona-bá vasina.
“Lalika fi’ar informasaun falsu sira, saúde iha ita-nia liman rasik vasina ne’e di’ak. Governu laiha hanoin aat ba nia povu. Governu nia papel atu proteje no kuidadu nia povu,” nia dehan.
Diretór Servisu Saúde Munisípiu Covalima, Filipe Pereira Lemos, agradese ba Vise-Ministru Edukasaun Juventude no Desportu, António Guterres, nia prezensa hodi halo aproximasaun ba komuunidade, nune’e taxa kobertura vasinasaun iha Covalima atinje ona 88% no agora hela de’it 11% atu tama ona ba 100%.
“Governante fahe informasaun kona-bá vasina atu fó neon metin ba ita hodi reforsa mós servisu hosi parte saúde,” nia dehan.
Tanba, nia dehan, taxa kobertura vasinasaun iha Covalima atinje ona 82% la’ós médiku no parteira sira mak servisu de’it, maibé autoridade lokál sira mobiliza komunidade mós kontribui hodi simu vasina.
“Ita hotu defende ita-nia an hosi COVID-19. Ita maória vasina ona ita bele livre halo movimentu ona,” nia hateten.
Xefe Suku Belekasak, Leonito Gusmão, informa populasaun iha suku Belekasak, aldeia Busadao ho populasaun 402 no hosi númeru ne’e feto 182 no mane 220 hosi xefe família 80 ne’e, abitante ne’ebè simu vasina dose dahuluk 49 no doze daruak 35.
“Prezensa governante iha ne’e, atu fahe informasaun no ita-boot sira bele rona direta hosi ita-nia governante ne’e, kona-bá importánsia hosi vasina ne’e ho loloos,” nia dehan.
Atu enkoraja komuunidade hodi bele simu vasina, durante Vise-MEJD nia prezensa iha suku Belekasak ne’e hodi halo kampaña vasinasaun hosi odamatan ba odamatan (tama sai sai aldeia), tanba taxa kobertura ba vasinasaun sei mínimu liu.
“Ho prezensa vise-Ministru Edukasaun Juventdue no Desportu (MEJD) iha suku ida-ne’e, halo komunidade antuziasmu simu vasina no taxa kobertura vasinasaun Covalima atinje ona 82%,” nia dehan.
Jornalista : Celestina Teles
Editór : Cancio Ximenes
