DILI, 18 outubru 2021 (TATOLI)–Ministériu Edukasaun Juventude no Desportu (MEJD), servisu hamutuk ho Ministériu Saúde (MS) hahú halo kampaña advokasia ba manorin sira iha eskola haat, kona-ba planu vasinasaun Pfizer ba estudante ho idade 12 to’o 17.
Eskola haat ne’e mak hanesan Eskola Sekundáriu Jerál 04 setembru Balide, Eskola Sekundáriu Tékniku Vokasionál Becora, Eskola Sekundáriu São Miguel no Eskola Téknika Informátika (ETI).
Diretór Servisu Edukasaun Munisípiu Dili, Duarte Braganza, hateten, iha ona informasaun katak posibilidade sei hahú vasina Pfizer iha loron 25 outubru, tanba ne’e MEJD no MS konvoka planu integradu hodi divulga informasaun ba inan-aman molok oan sira simu vasina.
“Ita agora hamutuk ho Ministériu Saúde halo daudaun ona kampaña advokasia ba manorin sira iha eskola haat ne’ebé sai sentru. Manorin sira tenke hetan uluk informasaun sufisiente kona-ba vasinasaun Pfizer ba estudante, atu nune’e sira bele fahe fali informasaun ba inan-aman sira,” Diretór Servisu Edukasaun hateten iha ninia knaar fatin, Comoro, segunda ne’e.
Notísia relevante: UNICEF entrega zelera ultra malirin haat ba MS
Tuir Braganza, inisiativa ne’e importante tebes tanba manorin sira mak besik liu ho estudante sira durante loron tomak.
“Sira tenke hetan uluk informasaun sufisiente, atu nune’e bele fahe fali informasaun ba inan-aman no estudante sira, karik balun sente ta’uk atu simu vasina,” nia akresenta.
Iha sorin seluk, Diretór Eskola Sekundáriu Tékniku Vokasionál Becora, Francisco Guterres, hateten, ba inisiativa ne’e kada eskola sei delega manorin na’in-hitu hodi partisipa iha kampaña advokasia ne’e.
Enkuantu, iha área Cristo Rei, Becora, iha Eskola Ensinu Báziku terseiru siklu no Ensinu Sekundáriu Jerál Tékniku Vokasionál hamutuk 15.
Iha loron sábadu (16/10), Estadu Unidu Amérika (EUA) liuhosi vasilidade COVAX, ho koordenasaun United Nations Children’s Fund (UNICEF), fornese vasina Pfizer hamutuk doze 100.620 ba Timor-Leste.
Notísia relevante: Vasina Pfizer doze 100.620 hosi EUA to’o iha Dili
Vasina Pfizer sei uza ba dahuluk uza iha Timor-Leste, ne’ebé define katak, doze daruak hosi vasina ne’e sei administra ho intervalu loron 21.
Enkuantu to’o loron 15 outubru, iha nível territóriu tomak, rejista ona ema ho idade 18 ba leten ne’ebé simu ona vasina AstraZeneca no Sinovac ba doze dahuluk hamutuk 504.194 (66,8%) no doze daruak 322.439 (42,7%), ho totál kobertura 826.634.
Jornalista : Tomé Amado
Editora : Julia Chatarina
