DILI, 18 outubru 2021 (TATOLI)–Ministru Defeza (MD), Filomeno de Jesus da Paixão, rekoñese katak veíkulu hanesan HiCom, ne’ebé daudaun ne’e FALINTIL-Forsa Defeza Timor-Leste (F-FDTL) utiliza tuan ona.
“Durante ne’e ha’u haree problema iha orsamentu, tanba ne’e maka iha limitasaun. Kona-ba manutensaun ba veíkulu militár iha, tanba iha kompañia indikadu no orsamentu ba manutensaun mós prevee nafatin, maibé HiCOM ne’ebé iha tuan loos ona,” Ministru relata hafoin hasoru Primeiru-Ministru, Taur Matan Ruak, iha Rezidénsia Farol, segunda ne’e.
Governante ne’e haktuir, veíkulu ba militár ne’e hetan apoia hosi parseiru sira desde tinan 2003 to’o agora, maibé seidauk iha foun atu subtitui.
Kona-ba ekipamentu ba operasionál no nesesidade membru F-FDTL, daudaun ne’e MD elabora hela lei programasaun militár, ne’ebé sei submete hotu lista nesesidade forsa sira inklui ekipamentu, ne’ebé sei lori ba diskute no aprova iha Parlamentu.
Foin lalais ne’e veíkulu HiCom hetan dezastre iha área Becora, maski la rezulta vítima no fulan kotuk akontese dezastre ida ho mini HiCom, hodi rezultadu membru F-FDTL ida lakon vida.
Jornalista : Antónia Gusmão
Editora : Julia Chatarina
