DILI, 18 outubru (2021)—Fundu Nasaun Unida ba Labarik (UNICEF, sigla Inglés), entrega jeleira ultra malirin (frigorífico) haat ba Ministériu Saúde hodi armazena vasina Pfizer BioNTech tanba presiza armazenamentu ho temperatura grau celcius negativa 86.
Ministra Saúde, Odete Maria Freitas Belo, agradese ba UNICEF tanba apoia ona Ministériu Saúde ho SAMES ba nia instalasaun, manutensaun no atualiza sistema armazenamentu korente malirin armazena no distribui vasina Covid-19 rutina la ho interupsaun.
“Frigorifiku sira sei ajuda ita armazena ho seguru vasina Pfizer BioNTch sira ho temperatura loloos, no permite ita atu implementa kampaña vasinasaun ba labarik sira tinan 12 to’o 18 mai kraik,” refere nota ne’ebé Agência TATOLI asesu, segunda ne’e.
Ho apoia ida ne’e, Governante ne’e dehan ba dahuluk Timor-Leste iha kapasidade hodi armazena vasina ho temperatura ultra-malirin. Hahú to’o mai kedas iha país iha loron 22 fulan-setembru, UNICEF servisu hamutuk ho Ministeriu Saúde, SAMES no fabrika atu garante katak país ne’e prontu hodi simu vasina Pfizer BionTech.
Vasina Pfizer BioNTech doze 100,620 lote dahuluk to’o ona iha país iha loron 16 Outubru. Grupu Konsultativu Tekniku Nasional ba Imunizasaun no Ministeriu saúde aprova ona vasinasaun ba labarik sira tinan entre 12 no 18 mai kraik ho vasina Pfizer BioNtch.
Nune’e, UNICEF apoia ona SAMES hodi instala no monitoriza nia temperatura loron ida dala-tolu hodi haree nia funsionamentu, no apoia formasaun SAMES nia tékniku sira, tékniku ekipamentu biomedikál sira, no staff ba operasaun, monitoriza no manutensaun sistema.
Iha biban hanesan, Reprezentativu UNICEF iha Timor-Leste, Bilal Durrani, hatete, armazena no transporta vasina sira ho temperatura loloos mak fundamental atu salva labarik no adultu sira husi moras potensialmente fatal.
Nune’e, UNICEF orgullu hodi apoia Timor-Leste tinan hirak ne’e, liu husi instalasaun sistema korente-malirin iha país ne’e ba imunizasaun rutina no mós ba vasinasaun Covid-19.
“Ita eleva ona kapasidade korente-malirin iha país ne’e ba nivel aas ho instalasaun sistema korente ultra-malirin ba primeira vez. Hahú husi SAMES, ita sei habelar gradualmente sistema korente-malirin ba parte sira seluk iha país ne’e” Bilal Durrani garante.
Aleinde ne’e, UNICEF mós sei hola tan frigorifiku temperatura ultra-malirin adisionál 16 ba Ministeriu Saúde, ho fundus husi Governu Australia.
Frigorifiku sira ne’e sei instala iha armazen rejionál sira, atu permite governu armazena vasina sira mak presiza temperatura ultra-malirin besik ba ospitál rejional sira no sentru saúde munisipal sira, no reduz tempu no kustu transportasaun vasina sira husi Dili ba sentru saúde sira.
Jornalista: Felicidade Ximenes
Editór: Florencio Miranda Ximenes
