COVALIMA, 19 outubru 2021 (TATOLI)—Vise-Ministru Interiór, António Armindo, lori Governu nia naran hato’o parabéns ba komunidade Covalima tanba komunidade nia partisipasaun halo taxa kobertura vasinasaun aas kompara ho munisípiu sira seluk.
Notísia Relevante: Covalima okupa fatin dahuluk progresu vasinasaun atinje 82,4%
“Ha’u reprezenta Governu fó parabéns ba inan-aman sira iha konsiénsia katak vasina ne’e importante. Autoridade lokál no seguransa ne’ebè servisu hamutuk ho inan-aman sira enkoraja inan-aman sira hakat ba sentru vasinanasaun hodi simu vasina,” Vise-Ministru Interiór ne’e hateten liuhosi nia diskursu bainhira realiza kampañia vasinasaun iha sede suku Lalawa, postu administrativu Tilomar, munisípiu Covalima, tersa ne’e.
Tanba, nia argumenta, taxa kobertura vasinasaun iha postu administrativu Tilomar, munisípiu Covalima ne’e, sidadaun sira-ne’ebé simu vasina ba doze dahuluk atinje 89% no ba doze daruak 66%, entaun ida-ne’e aas kompara ho munisípiu sira seluk.
Governu esforsu atu projete nia sidadaun sira labele mate tanba COVID-19, maske sidadaun balun mate tanba COVID-19 akontese nafatin maibé Timor-Leste la’ós tama iha kategoria pior liu.
“Ita-nia Governu servisu makaas, oinsa atu tau matan ba nia sidadaun sira bainhira moras lori ba izolamentu. Ita vasina atu projete ita-nia an, salva ita-nia vida no membru família, salva mós ema seluk lori moras da’et tutan ba ema seluk,” nia hateten.
Tanba ne’e, tuir nia, dalan úniku mak halo prevensaun atu ema lábele mate tanba COVID-19, entaun komunidade tenke iha konsiénsia simu vasina hodi hasa’e imunidade no bele kombate COVID-19.
Reprezentante Administradór Postu Administrativu Tilomar, Evaristo Afonso Carvalho, hateten administradór orienta ona xefe suku ho nia estrutura atu identifika sidadaun ne’ebè seidauk vasina atu bele hakbesik an ba sentru vasinasaun hodi simu vasina.
Suku Lalawa kompostu hosi aldeia Tula Eduk, Halimea, Kota Foun, Lítis ne’e hela sidadaun na’in-20 resin mak saidauk simu vasina.
Notísia Relevante: COVID-19: kazu detetadu foun 11 no ativu 98
Jornalista : Celestina Teles
Editór : Cancio Ximenes
