DILI, 19 outubru 2021 (TATOLI)–Responsável programa Atensaun no Responde Sedu (ATRES) hosi Organizasaun Naun Governamentál (ONG) BELUN, Romaldo Caetano, hateten, kampus bele sai fatin konflitu bainhira universidade la kria kondisaun adekuadu hanesan biblioteka no laboratóriu ba estudante.
“Estudante sira mai kampus dala barak uza tempu livre hodi konta de’it istória. Loloos sira bele uza tempu livre iha laboratóriu ka biblioteka hodi lee,” Responsável programa ATRES dehan, iha salaun Fakuldade Siénsia Sosiál, Universidade Nasional Timor Lorosa’e (UNTL), Caicoli, tersa ne’e.
Notísia relevante: SEPS no parseiru disemina informasaun prevene konflitu iha UNTL
Romaldo Caetano nota mós katak universidade laiha fasilidade adekuadu, tanba ne’e presiza iha alternativa.
“Nune’e, estudante sira bele aproveita, nune’e mós bele prepara aula kada semana hodi konvida painél sira mai fahe esperiénsia ba estudante sira kona-ba prevensaun konflitu ba estudante sira,” nia akresenta.
Tuir Responsável programa ATRES, maneira muda mentalidade estudante ida, la depende ba matéria ne’ebé simu iha aula maibé hosi esperiénsia hosi atividade extra sira.
“Ita-nia universidade sira dala barak hanorin de’it matéria, maibé dalan oinsá atu prevene estudante sira hosi konflitu laiha. maibé hosi edukasaun sívika ka diskusaun akadémiku nian, bele ajuda estudante sira sai autór ba prevensaun konflitu iha kampus no komunidade,” nia dehan.
Romaldo Caetano konsidera diseminasaun informasaun di’ak ba estudante sira maibé la garante prevensaun konflitu bele redús iha UNTL.
“Atu muda ema-nia mentalidade la fasil. Ita fó formasaun ka esplikasaun iha tempu badak nia laran de’it, hanoin ona atu muda ema-nia mentalidade ne’e ita mehi, maibé diseminasaun kona-ba prevensaun konflitu ne’e mak akontese beibeik, ha’u fiar mentalidade ema-nian bele muda hosi a’at ba di’ak,” nia subliña.
Jornalista : Tomé Amado
Editora : Julia Chatarina
