DILI, 19 outubru 2021 (TATOLI)–Ministériu Finansa (MF) liuhosi Sekretariadu Tékniku Fundu COVID-19, halo ona pagamentu ba pesoál liña frente hamutuk 449, hosi Sala Situasaun, Sentru Integradu Jestaun Krize (CIGC, sigla portugés), ho montante $322.925, ba períodu fulan-fevereiru to’o maiu 2021.
“Pagamentu ami halo iha segunda (18/10) ba fulan-haat, bazeia ba lista ne’ebé submete mai, restu sei halo pagamentu tuir mai,” Koordenadór Jerál Sekretariadu Tékniku Fundu COVID-19, Ernesto da Conceição Silva, hateten ba Agência TATOLI, via telefónika, tersa ne’e.
Enkuantu, iha loron tersa (12/10), MF halo uluk pagamentu ba pesoál liña frente, Polísia Migrasaun hamutuk 143, ho montante $158.790, ba períodu fulan-marsu to’o juñu 2021.
Notísia relevante: MF halo pagamentu suplementu remuneratóriu ba liña frente Polísia Migrasaun
Kona-ba Ministériu Administrasaun Estatál (MAE), iha pedidu hosi diresaun rua hanesan Administrasaun Jerál submete iha loron 29 setembru 2021, maibé pedidu ne’e Sekretariadu Téniku Fundu COVID-19 devolve fila tanba la prienxe rekezitu tuir Dekretu-Lei númeru 13/2021, tanba lista benefisiáriu maioria hanesan funsionáriu esensiál no la’ós funsionáriu liña frente.
Enkuantu, pedidu pagamentu hosi Diresaun Autoridade Lokál hosi munisípiu 13 submete iha loron 27 setembru 2021 no daudaun ne’e iha prosesu verifikasaun no kompleta dokumentu nesesáriu balun, no Sekretariadu Tékniku kontaktu ona MAE atu submete relatóriu adiantamentu 2020 ho montante $661.000.
Ministériu Interiór (MI), submete pedidu dahuluk iha loron 25 agostu 2021, maibé Sekretaraidu Tékniku devolve iha loron (20/09) tanba la prienxe rekezitu tuir Dekretu-Lei númeru 13/2021 tanba lista benefisiáriu ne’ebé submete, maioria funsionáriu esensiál no la’ós funsionáriu liña frente, nune’e iha loron 28 setembru submete hikas maibé kontinua devolve iha loron 01 outubru 2021 tanba kontinua submete lista benefisiáriu ne’ebé hanesan ho pedidu dahuluk maski iha reduzidu númeru benefisiáriu.
Casa Sivil Palásiu Prezidensiál submete lista iha loron 15 setembru 2021, maibé devolve iha loron 22 setembru, iha verifikasaun Sekretariadu Tékniku identifika iha duplika naran Polísia Nasionál Timor-Leste (PNTL) no médiku sira iha lista benefisiáriu, ne’ebé tuir loloos tenke inklui iha lista benefisiáriu PNTL no Ministériu Saúde, ho nune’e sekretariadu tékniku devolve fali dokumentu hodi halo koordenasaun entre institutu ne’ebé envolve, kona-ba pesoál sira ne’e.
Nune’e, iha loron 27 setembru haruka hikas ba Sekretariadu Téniku no daudaun iha prosesu verifikasaun no kompleta dokumentu nesesáriu balun.
Totál benefisiáriu PNTL 3.821 no F-FDTL 2.112
PNTL iha totál benefisiáriu 3.821 no totál orsamentu ne’ebé aloka ba suplementu remuneratóriu ba instituisaun ne’e hamutuk $5.130.280, ba períodu fulan-marsu to’o maiu 2021 no daudaun iha prosesu verifikasaun no kompleta dokumentu nesesáriu balun.
FALINTIL-Forsa Defeza Timor-Leste (F-FDTL) iha benefisiáriu hamutuk 2.112, ho totál pagamentu montante $6.510.075 ba períodu fulan-fevereiru to’o agustu 2021, ne’ebé daudaun iha prosesu verifikasaun no kompleta dokumentu nesesáriu balun.
Guarda Prizionál sira hamutuk 205, totál pagamentu hamutuk $282.675, ba períodu abríl to’o agustu 2021.
Maski nune’e, ba F-FDTL nian, Sekretariadu sei hato’o pedidu atu hetan Pareser Jurídiku ba Gabinete Apoiu Jurídiku no iha verifikasaun dokumentu, Sekretariadu identifika laiha aneksu despaixu husi Jestór Másimu kona-ba pesoál liña-frente, maibé iha de’it mak Orden Operasaun inklui laiha asinatura lista prezensa.
“Instituisaun sira seluk inklui ministériu saúde to’o agora seidauk submete pedidu, maski Sekretariadu Tékniku Fundu COVID-19 sosializa ona kona-ba dekretu-lei refere no komunika ona via telefónika,” Kooordenadór Jerál akresenta.
Prezidente Repúblika, Francisco Guterres Lú Olo, promulga ona altersaun daruak ba Dekretu-Lei Suplementu Remunetrátoriu ba liña frente ne’ebé halo atividade profisionál iha situasaun pandemia COVID-19, ne’ebé pagamentu hahú iha marsu to’o dezembru 2021 bainhira orsamentu Jerál Estadu (OJE) 2021 ramata, karik presiza hatutan suplementu ne’e ba tinan 2022, presiza iha fali Dekretu-Lei foun ida.
Dekretu-Lei kona-ba Suplementu Remuneratóriu define profisionál elejível ba direitu hetan direitu mak médiku, efermeiru, auxiliár ba asaun médika, parteiru sira, téniku análiza laboratóriu, tékniku saúde públika, tékniku radiolojia, sira-ne’ebé ezerse funsaun iha Sala Situasaun, Sentru Integradu Jestaun Krize (CIGC, sigla portugés), motorista veíkulu, responsável sira-ne’ebé lori ema ba izolamentu obrigatóriu, elementu PNTL no F-FDTL ne’ebé envolve iha prevensaun no kontrolu COVID-19.
Nune’e mós, traballadór sira iha Autoridade de Inspesaun no Fiskalizasaun Atividade Ekonómika, Sanitária no Alimentar (AIFAESA), Diresaun Nasionál Kuarentena no Bioseguransa, Servisu Migrasaun no Autoridade Aduaneira, Servisu Nasionál Intelijénsia, Diresaun Nasionál Seguransa Patrimóniu Públiku, no servisu autoridade ka administrasaun munisipál, responsável ba halibur, lori no soe lixu, sira ne’ebé hola parte servisu autoridade ka administrasaun munisipál, servisu munisipál ba fornesimentu bee-moos, koveiru sira no sira ne’ebé integra iha ekipa ne’ebé hala’o servisu iha Rejiaun Adminstrativa Espesial Oé-cusse Ambeno (RAEOA).
Antes ne’e, Prezidente Repúblika promulga Dekretu-Lei númeru 17/2020 loron 30 abríl, hodi fó direitu ba traballadór liña frente, atu idaidak simu mós suplementu remuneratóriu ida, ho efeitu hosi marsu 2020, maibé iha fulan-setembru 2020, Dekretu-Lei ne’e hetan alterasaun dahuluk.
Nune’e, ho alterasaun daruak ba Dekretu-Lei ne’e, aumenta tan profisionál sira ne’ebé iha direitu ba hetan suplementu remuneratóriu ne’e hanesan tékniku sira-ne’ebé partisipa iha programa vasinasaun kontra COVID-19, Guarda Prizionál, sira-ne’ebé servisu protesaun sívil, inklui bombeiru no traballadór sira seluk ne’ebé hala’o serbisu iha sentru izolamentu, profilátiku ka terapéutiku, no sira-ne’ebé kuida pasiente COVID-19 sira hanesan tau matan ba seguransa no servisu limpeza no mós sira-ne’ebé halo jestaun lixu.
Jornalista : Antónia Gusmão
Editora : Julia Chatarina
