DILI, 19 outubru 2021 (TATOLI)-Polísia Nasionál Timor-Leste (PNTL), hamutuk ho parseiru Polísia Federál Austrália liuhosi Timor-Leste Police Development Program (TLPDP), lansa manuál formasaun uza forsa no prinsipál uza arma fogu hodi fó treinamentu ba membru sira iha área operasaun.
“Ita tenta dezenvolve formasaun atu fahe ba buat tolu; oinsá atu foti kilat, oinsá maka atu lori kilat, no utiliza kilat,” Komandante Jerál PNTL, Komisáriu Faustino da Costa, hateten ba jornalista sira iha Kuartel-Jerál Caicoli, tersa ne’e.
PNTL liuhosi apoia Polísia Federál Austrália konsege halo revizaun ba manuál formasaun ne’ebé hahú introdúz iha tinan 2018.
Matéria iha manuál formasaun fó kompétensia ba instruktór sira fó treinamentu ba membru sira oinsá bele lori kilat no atu lori kilat tenke iha responsabilidade ba utilizasaun.
“Ho manuál formasaun agora ita separa membru sé maka atu lori kilat no sé maka atu la lori kilat inklui ho responsabilidade uzu,” Komisáriu Faustino akresenta.
Tuir Dekretu-Lei númeru 16/2009, loron 18 marsu, artigu 5, kona-ba Armamentu no Uniforme sira, iha aliña dahuluk, hateten membru sira PNTL nian, atu kumpre sira nia misaun, sei uza armamentu ne’ebé fahe ba sira.
Iha aliña daruak, bainhira la tama serbisu, membru PNTL proibidu atu lori arma ne’ebé fahe ba sira, arma hirak ne’e tenke halibur hodi rai iha fatin ne’ebé apropriadu iha unidade ka eskuadra ne’ebé membru kolokadu.
“Ita nia lei organika PNTL haruka hotu-hotu lori arma, maibé iha mata-dalan ida ne’e rasik, sita se maka lori kilat no uza kilat ne’e presiza liuhosi formasaun hosi sentru formasaun polísia, nune’e bele hatene loloos maka bele lori kilat no uza kilat,” Komandante Jerál PNTL ne’e afirma.
Iha biban hanesan, Komadante Sentru Formasaun Polísia (CCFP, sigla portugés), Superintendente Xefe Arquimino Ramos, reforsa formasaun ba membru PNTL liga ba manuál ne’e importante atu membru sira bele iha resposabilidade utiliza arma.
“Ita nia membru PNTL atu uza arma tenke tuir formasaun, psikotest no teste saúde atu iha responsabilidade uza arma ho di’ak,” nia afirma.
Entretantu, Reprezentante Polísia Federál Austrália, TLPDP, Superintendente Polisia Darren Boy, afirma, manuál formasaun ne’e importante bá membru PNTL atu oinsá halo serbisu no uzu arma fogu ho responsabilidade.
Notisía relevante: PDHJ-PNTL lansa manuál formasaun direitu umanu
Jornalista : Natalino Costa
Editór : Florencio Miranda Ximenes
